ექსპო-ჯორჯიაში 9 მაისს ევროპის დღე აღინიშნება. საქართველოში ევროკავშირის საელჩოს ფეისბუქ-გვერდზე ევროკავშირის ელჩი პაველ ჰერჩინსკი მოქალაქეებს ღონისძიებაზე იწვევს და ამბობს, რომ "წელს ევროპის დღე საქართველოში მხოლოდ საზეიმო აღნიშვნა არ არის, ეს შეხსენებაა, რომ ევროპა ყოველთვის საქართველოს ისტორიის ნაწილი იყო".

"მალე ეს ადგილი [ექსპო ჯორჯია] გარდაიქმნება დაუვიწყარ სივრცედ. ამ პავილიონში ჩვენი წევრი სახელმწიფოები წარმოადგენენ თავიანთ ქვეყნებს, მათ კულტურასა და ინოვაციებს — იმას, რაც მათ უნიკალურს ხდის.

ამ პავილიონში დაგხვდებათ ბევრი ისეთი შესაძლებლობა, რომელსაც აუცილებლად უნდა გაეცნოთ. იქნება სივრცე ბავშვებისთვის და უამრავი აქტივობა პატარებისთვის.

პირდაპირ ეთერში, სცენაზე, გაიმართება მნიშვნელოვანი საუბრები — გსურთ, რომ ჩვენი ახალი პოდკასტის მონაწილე გახდეთ?

წელს ევროპის დღე საქართველოში მხოლოდ საზეიმო აღნიშვნა არ არის, ეს შეხსენებაა, რომ ევროპა ყოველთვის საქართველოს ისტორიის ნაწილი იყო.

მე-11 პავილიონში აღმოაჩენთ იდეებს, რომლებიც მომავალს ქმნის და აქვე იხილავთ ბაზრობას, სადაც მეწარმეები თავიანთ პროდუქციას გაყიდიან. და ნახავთ კვების ზონასაც, სადაც ევროპული და ქართული გემოები ერთმანეთს ერწყმის.

დღის დასასრულისკენ კი დაგხვდებათ განსაკუთრებული კონცერტი, რომელიც არ უნდა გამოტოვოთ.

შემოგვიერთდით 9 მაისს ექსპო ჯორჯიაში, ერთად ვიზეიმოთ ევროპის დღე!” — ამბობს ევროკავშირის ელჩის საქართველოში, პაველ ჰერჩინსკის გავრცელებულ ვიდეოში.

საქართველოში ევროკავშირის საელჩოს ცნობით, ღონისძიების ფარგლებში ექსპო-ჯორჯიას ტერიტორიაზე დაგხვდებათ: საგანმანათლებლო და ინოვაციური სივრცეები: 27 წევრი სახელმწიფოს გამოფენები, ინფორმაცია საგანმანათლებლო შესაძლებლობებზე, ინოვაციებსა და გარემოს დაცვაზე.

აქტივობები ყველა ასაკისთვის: სახალისო და შემოქმედებითი კუთხეები ბავშვებისა და მოზრდილებისთვის.

მუსიკალური პროგრამა: დღის დასასრულს Bedford Falls-ის კონცერტი გაიმართება. ღონისძიებაზე დასწრება თავისუფალია. ევროკავშირის საელჩო მოუწოდებს ოჯახებსა და მეგობრებს, შაბათი დღე სასიამოვნო და შემეცნებით გარემოში გაატარონ.

ცნობისთვის, ყოველ წელს, 9 მაისს, ევროპის დღეს ევროკავშირი 1950 წლის შუმანის დეკლარაციის წლისთავს აღნიშნავს. სწორედ დეკლარაციიდან იღებს სათავეს ევროკავშირი.