პარლამენტის საპროცედურო საკითხთა და წესების კომიტეტის თავმჯდომარე დავით მათიკაშვილი აცხადებს, რომ პაველ ჰერჩინსკი ვალდებულია განმარტოს საკუთარი განცხადება, რომლის გამოც იგი საქართველოს საგარეო საქმეთა სამინისტროში დაიბარეს. ამის შესახებ მათიკაშვილმა "ტვ პირველის" ეთერში განაცხადა.

მისი თქმით, ელჩის შეფასებები ყოველგვარ ზღვარს გადაცილებულია და დიპლომატიასთან საერთო არაფერი აქვს.

"ევროკავშირის ელჩს მოუწევს იმის ახსნა, თუ რას გულისხმობს, როდესაც, პრაქტიკულად, ჩვენს ქვეყანას, ჩვენს ხალხს წარსულში დაბრუნებით ემუქრება. თვითონვე ბრძანა – სამოქალაქო ომი, სიღარიბე, სიღატაკე და ა.შ. თუკი არ მოხდება კონკრეტული მითითებების შესრულება, რაც მომდინარეობს ბრიუსელიდან", — განაცხადა მათიკაშვილმა.

მისივე შეფასებით, ელჩის განცხადებაში იკვეთება, რომ "ქართველი ხალხის არჩევანი, ჰყავდეს ეროვნული ხელისუფლება, არ არის მისაღები გარკვეული ძალებისთვის".

"ეს იყო ყოველგვარ ზღვარს გადაცილებული, დიპლომატიასთან საერთოდ არანაირი კავშირის მქონე განცხადება, რაც პირდაპირი ტექსტით გულისხმობს მუქარას ქართველ ხალხზე... კიდევ ერთხელ ჩანს და იშიფრება აქ, რომ ქართველი ხალხის არჩევანი, ჰყავდეს ეროვნული ხელისუფლება არ არის მისაღები კონკრეტული ძალებისთვის, მათ შორის, იმ ძალებისთვის, ვისაც წარმოადგენს ჰერჩინსკი," — აღნიშნა მან.

ცნობისთვის, ევროპის საგარეო ქმედებათა სამსახურში გამართულ ღონისძიებაზე ელჩმა, პაველ ჰერჩინსკიმ, განაცხადა, რომ საქართველო „სწორ ტრაექტორიაზე აღარ იმყოფება“ და ხელისუფლება ქვეყანას ევროკავშირს აშორებს.

"საქართველო გზაგასაყარზე დგას… ჩვენ არ უნდა დავუშვათ, რომ საქართველო დაბრუნდეს ძალადობის, სამოქალაქო ომის, სიღარიბის, გაჭირვების, კორუფციის ბნელ დროში. ეს არ არის ის მომავალი, რომელსაც ისინი იმსახურებენ," — განაცხადა ჰერჩინსკიმ.

მისივე თქმით, ევროკავშირი მზად არის, დაეხმაროს საქართველოს გაწევრიანებაში, თუ ხელისუფლება თანამშრომლობის სურვილს გამოხატავს.

აღნიშნული განცხადებების შემდეგ, ევროკავშირის ელჩი საქართველოში საგარეო საქმეთა სამინისტროში დაიბარეს.