სახელმწიფო უსაფრთხოების სამსახურის მიერ 22 აპრილს დაკავებული, ჯაშუშობაში ბრალდებული ახალგაზრდა კაცი, 27 წლის ახალგორელი თამაზ გოლოევია (გოლოთი), რომელიც დედით ქართველი, ხოლო მამით ოსია. ის ცხინვალში სწავლობდა და თბილისში ხშირად ჩადიოდა. ამის შესახებ ინფორმაციას "რადიო თავისუფლება" ავრცელებს.

დაკავებულის დედა ამბობს, რომ მისი შვილი თბილისში ახალგორიდან 2026 წლის 22 აპრილს, დილით ჩავიდა და ჩასვლისთანავე დააკავეს, რის შესახებაც მან ტელევიზორიდან გაიგო. ამის შემდეგ ქალი თბილისში თვითონაც ჩავიდა, თუმცა შვილთან შეხვედრა ვერ მოახერხა.

"მგონია, რომ ტყუილად აბრალებენ", — ამბობს დედა რადიო თავისუფლებასთან საუბარში.4

მისი თქმით, მან არაფერი იცის საქმის ორ სხვა ფიგურანტზე, რომლებიც სუსის ცნობით, ასევე ჯაშუშობაში არიან ეჭვმიტანილი და მათზე ძებნაა გამოცხადებული.

შეგახსენებთ, საქართველოს პროკურატურამ გოლოევსა და კიდევ 2 პირს ბრალდება 23 აპრილს წარუდგინა. მათ წინააღმდეგ გამოძიება საქართველოს სისხლის სამართლის კოდექსის 314-ე მუხლის პირველი ნაწილით (ჯაშუშობა) გრძელდება, რაც სასჯელის სახედ 8-დან 12 წლამდე თავისუფლების აღკვეთას ითვალისწინებს.

სუს-ს არ დაუსახელებია ქვეყანა, რომლის სასარგებლოდ ჯაშუშობაშიც ადანაშაულებენ დაკავებულსა და ძებნაში მყოფ პირებს, თუმცა პროსამთავრობო ტელეკომპანია "რუსთავი-2-ის" ინფორმაციით, სუს-ის მიერ დაკავებულიცა და ძებნაში მყოფებიც რუსეთის სასარგებლოდ ჯაშუშობდნენ.