დღეს ის არის სახელმწიფო მინისტრი, რომელსაც აკისრია სამართალდამცავი ორგანოების კოორდინაციის მოვალეობა. მიუხედავად იმისა, რომ სუს-ის უფროსი არის გამორჩეული მაღალი რანგის თანამდებობა, კოორდინაციის ფუნქცია არის კიდევ უფრო მაღალი, — განაცხადა ირაკლი კობახიძემ ქართულ ოცნებაში განხორციელებულ საკადრო ცვლილებებზე საუბრისას.

"2 კვირაა ვმსჯელობდით ამასთან დაკავშირებით, თუმცა გადაწყვეტილება როცა მივიღეთ, მაშინ გავაცანით საზოგადოებას.

...ჩვენ მიგვაჩნია, რომ მამუკა მდინარაძე იმსახურებდა ამ წოდებას მისი საქმიანობიდან გამომდინარე, კონკრეტულად სახელმწიფო უსაფრთხოების სამსახურში, მიუხედავად იმისა, რომ ამ სამსახურის უფროსის თანამდებობაზე ის საქმიანობდა დაახლოებით ნახევარი წლის განმავლობაში. მას ჰქონდა ძალიან მნიშვნელოვანი, ფუნდამენტური ცვლილებები და მიღწევები, როგორც სისტემური გადახალისების, ინსტიტუციური გადახალისების კუთხით.

დღეს ის არის სახელმწიფო მინისტრი, რომელსაც აკისრია სამართალდამცავი ორგანოების კოორდინაციის მოვალეობა", — განაცხადა ირაკლი კობახიძემ "ტვ პირველის" ჟურნალისტთან საუბრისას.

ჟურნალისტის კითხვაზე, შეიძლება თუ არა ჩაითვალოს ეს დაწინაურებად, კობახიძემ უპასუხა:

"ფორმალურად შეხედავ თუ არაფორმალურად, ეს არის უფრო მაღალი რანგი. მიუხედავად იმისა, რომ სუს-ის უფროსი არის ძალიან მაღალი, გამორჩეული მაღალი რანგის თანამდებობა, ამის მიუხედავადაც შეიძლება ითქვას, რომ კოორდინაციის ფუნქცია არის კიდევ უფრო მაღალი", — განაცხადა კობახიძემ.

შეგახსენებთ, რომ 21 აპრილს ცნობილი გახდა, რომ ქართულ ოცნებაში საკადრო ცვლილებები განხორციელდა — შს მინისტრმა გეკა გელაძემ სუს-ის უფროსის პოსტზე მამუკა მდინარაძე ჩაანაცვლა. თავის მხრივ — სუს-ის უფროსი მამუკა მდინარაძე სამართალდამცავი ორგანოების კოორდინაციის საკითხებში სახელმწიფო მინისტრად ინიშნება და ვიცეპრემიერობასაც შეითავსებს. ხოლო შს მინისტრის პოსტს აჭარის ავტონომიური რესპუბლიკის მთავრობის თავმჯდომარე სულხან თამაზაშვილი დაიკავებს.