სომხეთის სამოციქულო ეკლესიის რეფორმა გარდაუვალი აუცილებლობაა — ამის შესახებ სომხეთის პრემიერმინისტრმა, ნიკოლ ფაშინიანმა სამშაბათს, Facebook-ის პირდაპირ ეთერში განაცხადა, სადაც 7 ივნისის საპარლამენტო არჩევნებისთვის მმართველი პარტიის, სამოქალაქო ხელშეკრულების, საარჩევნო პროგრამა წარადგინა.

პრემიერმინისტრის განცხადებით, ბოლო ათწლეულების განმავლობაში ეკლესიის ხელმძღვანელობის ქმედებებმა მრევლის ნაწილის გაუცხოება გამოიწვია. სომხური მედიის ცნობით, ფაშინიანი მიიჩნევს, რომ ამ ვითარებით გარე ძალები სარგებლობენ და სომხური სამოციქულო ეკლესიის ჰიბრიდული ომის ინსტრუმენტად ქცევას ცდილობენ.

ამასთან დაკავშირებით, ფაშინიანმა დასძინა, რომ მმართველი პარტიის საარჩევნო პლატფორმა მოიცავს ეკლესიის რეფორმირების სამოქმედო გეგმას. აღნიშნული გეგმის პირველი პუნქტი სრულიად სომეხთა კათოლიკოსის, გარეგინ II-ის გადადგომაა, რასაც უნდა მოჰყვეს მისი ადგილმონაცვლის არჩევა, ეკლესიის ახალი წესდების მიღება, ფინანსური გამჭვირვალობის უზრუნველყოფა და სამღვდელოების ღირსეული ქცევის წესების დადგენა. პროცესი ახალი კათოლიკოსის არჩევითა და ზოგადი რეფორმებით უნდა დასრულდეს, რაც ეკლესიას პოლიტიკური გავლენებისგან გაათავისუფლებს.

"ეკლესია სახელმწიფოსგან გამოყოფილია, მაგრამ ის ვერ იარსებებს სახელმწიფოს მიღმა", — აღნიშნა ფაშინიანმა.

ეკლესიის ბიბლიური არსის განხილვის შემდეგ, პრემიერმა დაასკვნა, რომ სომხური სამოციქულო ეკლესიის ხელმძღვანელობის ქმედებებმა ქვეყნის სულიერი ცხოვრება გააუარესა. მისივე თქმით, ის ფაქტი, რომ სამღვდელოება ვერ სარგებლობს მთავრობის მიერ შეთავაზებული სოციალური გარანტიებით, ეკლესიის მარგინალიზაციის მცდელობაზე მეტყველებს.

ფაშინიანმა განაცხადა, რომ საბოლოო მსაჯული ხალხია და სომეხმა ერმა თავად უნდა გასცეს პასუხი კითხვას — არის თუ არა მისაღები, რომ კტრიჩ ნერსისიანმა (კათოლიკოს გარეგინ II) ეკლესია პოლიტიკურ პარტიად აქცია და სულიერი ქადაგებები პოლიტიკური რიტორიკით ჩაანაცვლა.

"ჩვენი წმინდა ეჩმიაძინი თქვენი ინფექციით შეიბილწა“, — მიმართა პრემიერმა სამღვდელოებას და დასძინა, რომ მისთვის წარმოუდგენელია, როგორ შეიძლება ასეთ პირობებში სულიერ ფასეულობებზე დაფუძნებულმა საზოგადოებამ იარსებოს. ფაშინიანი მიიჩნევს, რომ ეს საკითხიც მომავალ საპარლამენტო არჩევნებზე უნდა გადაწყდეს.

სომხური დიასპორის კონტექსტში ფაშინიანმა გამოთქვა შეშფოთება, რომ საზღვარგარეთ ხშირად არა სომხეთის, არამედ უცხოური ინტერესების გატარება ხდება, რაც ქვეყნის სუვერენიტეტსა და უსაფრთხოებას ეწინააღმდეგება.

"სომხური სამოციქულო ეკლესია ეწევა გარკვეულ საქმიანობას და ვალდებულია გადაიხადოს გადასახადები. ჩვენ მზად ვართ, აკრეფილი გადასახადების 100% და მეტიც, სოციალური გარანტიების სახით დავუბრუნოთ ეკლესიას. რატომ არ თანხმდებიან ისინი ამაზე კტრიჩ ნერსისიანის მეთაურობით? იმიტომ, რომ მათ სურთ ჩრდილში მოქმედება და არ სურთ იყვნენ ანგარიშვალდებულნი არც ეკლესიისა და არც სახელმწიფოს წინაშე.", — განაცხადა ნიკოლ ფაშინიანმა