პოლიტიკური და სამოქალაქო მოძრაობების წარმომადგენლებმა, ელენე ხოშტარიამ, თამუნა გიორგაძემ, ლიკა ბასილაია-შავგულიძემ, მარიამ მელიქიშვილმა, ნუცა მახარაძემ, ნინო ბარძიმაშვილმა, ქრისტინე ბოტკოველმა და ნინო დათაშვილმა, ევროსაბჭოს ადამიანის უფლებათა კომისარს, მაიკლ ო’ფლაერტს წერილით მიმართეს. მიმართვის მთავარი თემა დროებითი მოთავსების იზოლატორებში ადამიანების იძულებითი გაშიშვლების საგანგაშო პრაქტიკაა.

პარტია დროას ინფორმაციით, პოლიტიკურმა პატიმარმა ელენე ხოშტარიამ 7 დაზარალებულ ქალთან ერთად ევროპის საბჭოს ადამიანის უფლებათა კომისარ მაიკლ ო'ფლაერტს წინასწარი მოთავსების იზოლატორებში გაშიშვლების ძალადობრივი პრაქტიკის შესახებ წერილით მიმართა, რომელიც საქართველოში 2-დღიანი ვიზიტით იმყოფება.

ელენე ხოშტარია და წერილის ხელმომწერები კომისარს მოუწოდებენ, გამოიყენოს მისი უფლებამოსილების ფარგლებში არსებული ყველა მექანიზმი, რათა დასრულდეს ეს ღირსების შემლახავი პრაქტიკა და პასუხისგებაში მიეცეს ყველა დამნაშავე პირი.

წერილში ხაზგასმულია, რომ 2025 წლის მარტში ელენე ხოშტარიას წინააღმდეგ დიღმის იზოლატორში განხორციელებული ძალადობა არ არის ცალკეული შემთხვევა. ძალადობრივი გაშიშვლების პრაქტიკას სისტემური ხასიათი აქვს და გამოიყენება დემოკრატიული, პროევროპული წინააღმდეგობის მოძრაობის მონაწილეებზე ძალადობისთვის და მათი დაშინების მიზნით.

"ეუთოს მოსკოვის მექანიზმის ანგარიშმა მკაფიოდ გაუსვა ხაზი, რომ ძალადობრივი გაშიშვლების შემთხვევები არ არის მხოლოდ პროცედურული გადაცდომა, ეს არის ადამიანის უფლებების სისტემური დარღვევა. და ეს პრაქტიკა წარმოადგენს უფრო ფართო, სახელმწიფოს მიერ ორგანიზებული წამების სისტემის ერთ-ერთ საყრდენს", — აღნიშნულია წერილში.

ხელმომწერები ხაზგასმით აღნიშნავენ, რომ მხოლოდ პრობლემის აღწერა საკმარისი არ არის — აუცილებელია კონკრეტული დამნაშავეების დასჯა. მათივე განმარტებით, " საქართველოში ვერ დამყარდება სტაბილურობა სამართლიანობის აღდგენისა და ადამიანის ღირსების უმთავრეს ღირებულებად აღიარების გარეშე."

"პროტესტის მონაწილე საქართველოს მოქალაქეების შეუჩერებელი წინააღმდეგობა სიმტკიცე და გამძლეობა ცხადყოფს, რომ საქართველოში ვერ დამყარდება სტაბილურობა სამართლიანობის აღდგენისა და ადამიანის ღირსების უმთავრეს ღირებულებად აღიარების გარეშე", — ნათქვამია მიმართვაში.

შეგახსენებთ, იზოლატორებში სრული გაშიშვლების ფაქტებზე არაერთი დაკავებული საუბრობს, რაც ეწინააღმდეგება როგორც ადგილობრივ, ისე საერთაშორისო ნორმებს.