შუახმელეთი ლას-ვეგასს CinemaCon-ის ფარგლებში ეწვია. Warner Bros. სტუდიამ ენდი სერკისის მომავალი ფილმისთვის, ბეჭდების მბრძანებელი: ნადირობა გოლუმზე (The Lord of the Rings: The Hunt for Gollum) სამსახიობო ჯგუფის რამდენიმე წევრი დაასახელა. ფილმის პრემიერა 2027 წლის 17 დეკემბერს იგეგმება.

ფილმის რეჟისორობასთან ერთად, ენდი სერკისი კვლავ მოირგებს გოლუმის/სმეგოლის როლს. პროექტში ბრუნდებიან ძველი სახეებიც: იან მაკკელენი გენდალფის როლში, ელაიჯა ვუდი ფროდო ბეგინსის ამპლუაში და ლი პეისი, რომელიც კვლავ თრანდუილს განასახიერებს.

ახალ ქასთში ყველაზე ხმაურიანი სიახლე ჯეიმი დორნანია, რომელიც მაწანწალას (Strider) განასახიერებს, პერსონაჟს, რომელიც მოგვიანებით არაგორნი აღმოჩნდება, ამ როლს ორგინალურ ტრილოგიაში ვიგო მორტენსენი ასრულებს. ასევე ვიხილავთ კეიტ უინსლეტს (მარიგოლი) და ლეო ვუდალს (ჰალვარდი).

ჯეიმი დორნანი

ფოტო: Getty Images

ვიგო მორტენსენი არაგორნის როლში

ფოტო: Warner Bros.

ფილმის სიუჟეტი ტოლკინის სამყაროს იმ პერიოდს შეეხება, რომელიც ჰობიტის მოვლენებსა და ბეჭდის საძმოს დასაწყისს შორის ხდება. ამბის ცენტრში არის გოლუმის ძებნა, ეს ის დროა, როდესაც გენდალფი და არაგორნი ცდილობენ იპოვონ გოლუმი, სანამ ის საურონის ხელში ჩავარდება. ეს ისტორია ტოლკინის წიგნებში მხოლოდ მოკლედ არის ნახსენები და ფილმი სწორედ ამ ეპიზოდის გაფართოებას შეეცდება. ორიგინალური ტრილოგიის სცენარისტებს, ფრან უოლშსა და ფილიპა ბოიენსს, ჯ.რ.რ. ტოლკინის მასალის ადაპტირებაში ფიბი გიტინსი და არტი პაპაგეორგიუ დაეხმარებიან.

ტოლკინმა ბეჭდების მბრძანებლის ტრილოგია 1950-იან წლებში დაწერა, მას შემდეგ, რაც 1937 წელს ჰობიტმა დიდ წარმატებას მიაღწია. პიტერ ჯექსონმა ტრილოგია ეკრანებზე 2001, 2002 და 2003 წლებში გადაიტანა, მოგვიანებით კი, 2012-2014 წლებში, ჰობიტიც კინოტრილოგიად აქცია.

ორიგინალური ფილმები კინოსამყაროსთვის გარდამტეხი აღმოჩნდა როგორც ფინანსური, ისე ტექნიკური თვალსაზრისით. მათ მსოფლიო მასშტაბით თითქმის 3 მილიარდი დოლარი დააგროვეს და 17 ოსკარი მოიპოვეს. მესამე ნაწილმა, მეფის დაბრუნებამ, 2004 წელს საუკეთესო ფილმის ნომინაციაში გაიმარჯვა და ჯამში 11 ოსკარი მოიპოვა. ენდი სერკისის შესრულება გოლუმის როლში კი მოძრაობის ჩაწერის ტექნოლოგიაში ნამდვილი რევოლუცია იყო.

New Line Cinema შუახმელეთს 2024 წელსაც დაუბრუნდა ანიმაციური ფილმით ბეჭდების მბრძანებელი: როჰირიმთა ომი. პარალელურად, Amazon-MGM საკუთარი საავტორო უფლებების ფარგლებში აგრძელებს მუშაობას სერიალზე ბეჭდების მბრძანებელი: ძალაუფლების ბეჭდები, რომლის მესამე სეზონიც ამჟამად მზადების პროცესშია.