სახალხო დამცველის, ლევან იოსელიანის სამუშაო შეხვედრა ევროპის საბჭოს ადამიანის უფლებათა კომისარ მაიკლ ო'ფლაერტისთან ცოტა ხნის წინ დასრულდა. ომბუდსმენის ინფორმაციით, მხარეებმა დეტალურად განიხილეს ადამიანის უფლებათა მდგომარეობა საქართველოში და ის ყოველწლიური ანგარიში, რომელიც სახალხო დამცველმა პარლამენტს უკვე წარუდგინა.

მაიკლ ო'ფლაერტი განსაკუთრებით დაინტერესდა პოლიტიკური ნიშნით დაკავებული პირებისა და სინდისის პატიმრების მდგომარეობით. საუბარი ასევე შეეხო "ქართული ოცნების" მიერ ინიცირებულ საკანონმდებლო ცვლილებებსა და გამკაცრებულ რეგულაციებს. ევროპელი მაღალჩინოსანი დაინტერესდა იმითაც, დადგა თუ არა სამართალდამცავთა პასუხისმგებლობის საკითხი საპროტესტო აქციების დროს მომიტინგეების ფიზიკური შეურაცხყოფის ფაქტებზე.

"ძალიან მნიშვნელოვანი შეხვედრა იყო. რა თქმა უნდა, შეხვედრა შეეხებოდა ზოგადად ადამიანის უფლებათა მდგომარეობას საქართველოში. აინტერესებდა მათ შორის, მე, როგორც სახალხო დამცველი რა პროცესში ვარ ჩართული და საუბარი იყო იმ ანგარიშის ირგვლივ, რომელიც წარვადგინეთ პარლამენტში.

რამდენიმე საკითხს გაესვა ხაზი. მათ შორის, საოკუპაციო ხაზის გასწვრივ მცხოვრები ჩვენი მოქალაქეების მდგომარეობას; პროტესტის ედეგად დაკავებული ადამიანების მდგომარეობას, ვინც ახლა საპატიმროში არიან და ამავე დროს დაისვა კითხვები, არის თუ არა პასუხისგებაში მიცემული, ვინც შეიძლება იყოს დამნაშავე იმ ადამიანების ცემაში, ვინც იმ პერიოდში იყვნენ ნაცემი. ამავე დროს ერთ-ერთი საკითხი იყო, ზოგადად, ორგანიზაციების მდგომარეობა საქართველოში. ბოლო საკანონმებლო ცვლილებების პაკეტი, რომელიც პარლამენტში იქნა მიღებული და ასე შემდეგ. ამის ირგვლივ იყო ძირითადად საუბარი. ძალიან კარგი შეხვედრა იყო და იმედი მაქვს, რომ ჩვენი პარტნიორული ურთიერთობა, რომელიც უკვე 2 წელია გვკავშირებს ბატონ ო'ფლაერტთან ასევე კარგად გაგრძელდება", — განაცხადა სახალხო დამცველმა, ლევან იოსელიანმა "ტვ პირველთან" საუბრისას.

საქართველოში ადამიანის უფლებების დარღვევების შესახებ ახალი ანგარიშის გამოქვეყნება, სავარაუდოდ, მომავალ კვირაში იგეგმება.

შეგახსენებთ, რომ სახალხო დამცველთან შეხვედრამდე მაიკლ ო'ფლაერტმა კონსულტაციები არასამთავრობო სექტორის წარმომადგენლებთანაც გამართა.

ცნობისთვის, 2025 წლის მარტში ევროსაბჭოს ადამიანის უფლებათა კომისარი, მაიკლ ო'ფლაერტი ქართულ ოცნებას მოუწოდებდა დემონსტრანტების წინააღმდეგ არასათანადო მოპყრობის შემთხვევების ეფექტური გამოძიების უზრუნველსაყოფად ყველა საჭირო ზომა მიეღო.

მემორანდუმში ასევე ვკითხულობთ, რომ ევროსაბჭო "უცხოური გავლენის გამჭვირვალობისა" და "ოჯახური ღირებულებებისა და არასრულწლოვანთა დაცვის" შესახებ კანონების გაუქმების რეკომენდაციას გასცემს. კომისარი ასევე შეშფოთებული იყო მზია ამაღლობელის საქმეზე და მისი შეფასებით ჟურნალისტის წინასწარი დაკავება გაუმართლებელია.