ევროკომისიამ უნგრეთის საპარლამენტო არჩევნებში გამარჯვებულ პეტერ მადიარისთან მოლაპარაკებები უკვე დაიწყო. ბრიუსელში იმედოვნებენ, რომ ახალი მთავრობა გააუმჯობესებს ურთიერთობებს უკრაინასთან და ევროკავშირის მიერ უნგრეთისთვის გამოყოფილი 35 მლრდ ევროს განბლოკვისთვის საჭირო რეფორმებს გაატარებს. ინფორმაციას Financial Times-ზე დაყრდნობით, RBC-Ukraine ავრცელებს.

ამ დროისთვის უნგრეთისთვის განკუთვნილი დაახლოებით 35 მილიარდი ევრო გაყინულია ბრიუსელთან უთანხმოების გამო. თანხის ნაწილი — დაახლოებით 18 მილიარდი ევრო — უკავშირდება სამართლის უზენაესობის დარღვევასა და კორუფციის რისკებს, ხოლო 17 მილიარდ ევროზე მეტი შეღავათიანი სესხების სახით არის გამოყოფილი.

დაფინანსების მისაღებად უნგრეთმა 27 პირობა უნდა დააკმაყოფილოს, მათ შორის ანტიკორუფციული ზომების გატარება და ევროკავშირის წესებთან შეუსაბამო გადაწყვეტილებების გადახედვა.

ევროკავშირის წარმომადგენლების თქმით, არჩევნების შედეგმა მოლოდინებს გადააჭარბა, თუმცა ახალ მთავრობას უფრო მაღალი მოთხოვნებიც დაუწესა. მათი განცხადებით, თუ ბუდაპეშტი რეფორმებს განახორციელებს, ბრიუსელიც შესაბამის ნაბიჯებს გადადგამს.

"მას [მადიარს] აქვს სრულფასოვანი მანდატი, შეცვალოს ყველაფერი... და ჩვენ მასთან პირველივე დღიდან ვთანამშრომლობთ. აზროვნება ასეთია: გავაორმაგოთ მასზე ძალისხმევა. თუ ისინი შეასრულებენ დავალებებს, ჩვენც შევასრულებთ მათ", — განაცხადა ევროკავშირის მაღალჩინოსანმა.

დიპლომატების შეფასებით, მნიშვნელოვანი სიგნალი იქნება უნგრეთის მხრიდან 90 მილიარდი ევროს დახმარების პაკეტის განბლოკვა უკრაინისთვის და უნგრეთის ვეტოს მოხსნა რუსეთის წინააღმდეგ ახალი სანქციების დაწესებაზე.

ევროკომისია ასევე მოითხოვს იმ დავის მოგვარებას, რომელიც დაკავშირებულია უნგრეთის მიერ ევროპული სასამართლოს გადაწყვეტილებების შეუსრულებლობასთან მიგრაციის საკითხებზე. აღნიშნულმა კონფლიქტმა უკვე გამოიწვია დაახლოებით 900 მილიონ ევრომდე ჯარიმა.

ევროკავშირის ერთ-ერთი წარმომადგენლის განცხადებით, ბრიუსელს მნიშვნელოვანი ბერკეტები აქვს და ზეწოლა ახალ ლიდერზე იზრდება, თუმცა ის სწრაფ შედეგებზეა ორიენტირებული.

"ჩვენი მხრიდან დიდი ბერკეტებია. ზეწოლა მასზეა [მადიარზე] და ვფიქრობ, რომ მას სურს სწრაფად შეასრულოს ისინი“, — აღნიშნა მან.

თავის მხრივ, მადიარი გეგმავს პირველ ვიზიტებს ვარშავასა და ვენაში. ამასთან, არ გამორიცხავს ბრიუსელში ჩასვლასაც ფინანსურ საკითხებზე მოლაპარაკებისთვის.

ცნობისთვის, მან უკვე განაცხადა, რომ უკრაინის ევროკავშირში დაჩქარებული წესით მიღებას არ უჭერს მხარს, თუმცა არ აპირებს უკრაინისთვის 90 მილიარდი ევროს დახმარების ბლოკირებას.

შეგახსენებთ, 12 აპრილს უნგრეთში საპარლამენტო არჩევნები გაიმართა, რომლის შედეგებითაც ოპოზიციონერი პეტერ მადიარის პარტიამ ვიქტორ ორბანის 16-წლიანი მმართველობა დაასრულა. პეტერ მადიარის პარტიამ ხმების 53%% მოიპოვა, რაც პარლამენტში 138 მანდატის მიღებას ნიშნავს. ვიქტორ ორბანის პარტიამ კი 38% მიიღო (55 მანდატი).