უნგრეთის მთავრობა უკრაინისთვის ევროკავშირის 90 მილიარდი ევროს სესხის გამოყოფაზე წინააღმდეგობას შეწყვეტს — ამის შესახებ ქვეყნის მომავალმა პრემიერმინისტრმა, პეტერ მადიარმა განაცხადა. ინფორმაციას POLITICO ავრცელებს.

ბუდაპეშტში გამართულ პრესკონფერენციაზე მადიარმა აღნიშნა, რომ ევროკავშირის გადაწყვეტილება სესხის შესახებ "ჯერ კიდევ დეკემბერში მიიღეს" და მის ადმინისტრაციას სურს, წინა ვალდებულებების მიმართ "თანმიმდევრული იყოს".

ვიქტორ ორბანმა, რომელმაც საპარლამენტო არჩევნებში დიდი სხვაობით წააგო, გასული წლის ბოლოს ევროკავშირის ლიდერების სამიტზე სესხის გაცემას თავდაპირველად მხარი დაუჭირა, თუმცა მოგვიანებით შეთანხმებაზე უარი თქვა, რაც საერთო პროტოკოლის დარღვევა იყო. იგი აცხადებდა, რომ თანხების გამოყოფის ნებას იქამდე არ დართავდა, სანამ უკრაინა არ შეაკეთებდა იმ მილსადენს, რომლითაც რუსული ნავთობი უნგრეთს მიეწოდება. ორბანი კიევს სარემონტო სამუშაოების განზრახ გაჭიანურებაში ადანაშაულებდა.

POLITICO წერს, რომ სესხის განსაბლოკად ლიდერების ხელახალი შეხვედრა საჭირო აღარ იქნება. მადიარმა მიანიშნა, რომ გადაწყვეტილება შეიძლება მისი მთავრობის მიერ უფლებამოსილების ოფიციალურ გადაბარებამდეც (რაც ერთ თვეში იგეგმება) მიიღონ.

თუმცა, იმ შემთხვევაშიც კი, თუ უნგრეთი სესხის გაცემას დათანხმდება, ქვეყანა მასში საკუთარ წილს არ შეიტანს.

"ამ საკითხს ევროპელ ლიდერებთან განვიხილავ, მაგრამ პირადად ვეთანხმები იმას, რომ უნგრეთმა ამაში მონაწილეობა არ მიიღოს, რადგან ქვეყანა ძალიან რთულ მდგომარეობაშია. ჩვენ არ შეგვიძლია კიდევ უფრო მეტი სესხის აღება, რადგან უნგრეთის ბიუჯეტის დეფიციტი 2010 წლის შემდეგ გასამმაგდა", — განაცხადა მადიარმა.

მადიარმა, რომელიც წარსულში ორბანის მოკავშირე იყო, კვირის არჩევნებში პარლამენტში საკონსტიტუციო უმრავლესობა მოიპოვა და თავისი ყოფილი უფროსის 16-წლიანი მმართველობა დაასრულა. მან პირობა დადო, რომ კორუფციას მკაცრად დაუპირისპირდება, ხოლო მიმავალი მთავრობა რუსეთის მხარდაჭერის გამო "ღალატში" დაადანაშაულა.