28 მარტს აშშ-ის ქალაქებში აშშ-ის პრეზიდენტის, დონალდ ტრამპის საწინააღმდეგო აქციები გაიმართა. შეკრებილები ირანთან ომს, გამკაცრებულ საიმიგრაციო კონტროლსა და გაზრდილ ცხოვრების ხარჯებს აპროტესტებდნენ, რაც "არა მეფეებს" (No Kings) აქციების მესამე ტალღას წარმოადგენს. ამის შესახებ BBC წერს.

შაბათის განმავლობაში დემონსტრაციები გაიმართა როგორც აშშ-ის დიდ ქალაქებში, ასევე დაბებსა და პატარა ქალაქებშიც. ვაშინგტონის ცენტრალურ ქუჩებში აქციები მთელი დღის განმავლობაში მიმდინარეობდა, დემონსტრანტები დედაქალაქის ქუჩებში მსვლელობით გადაადგილდებოდნენ. როგორც აქციათა წინა ტალღების დროს, მომიტინგეებს ტრამპის, ვიცე-პრეზიდენტ ჯეი დი ვენსისა და ადმინისტრაციის სხვა მაღალჩინოსნების ფიტულები ჰქონდათ გამოტანილი და ითხოვდნენ მათ გადაყენებასა და დაპატიმრებას.

BBC-ის ცნობით, აქციაში 8 მილიონზე მეტმა ადამიანმა მიიღო მონაწილეობა. ამ მაჩვენებელმა გადააჭარბა გასული წლის ოქტომბრის აქციის მაჩვენებელს, რომელშიც მონაწილეთა რიცხვი დაახლოებით 7 მილიონს შეადგენდა.

"ტრამპს სურს ჩვენზე ტირანივით იმეფოს. მაგრამ ეს ამერიკაა და ძალაუფლება ხალხს ეკუთვნის და არა მეფობის მსურველებს, ან მათ მილიარდერ მოკავშირეებს", — ნათქვამია ორგანიზატორების განცხადებაში.

მონაწილეთა რაოდენობასთან დაკავშირებით თეთრი სახლის პრესსპიკერმა განაცხადა, რომ BBC-ს არ აქვს შესაძლებლობა დაადასტუროს ორგანიზატორების მიერ გაკეთებული განცხადება აქციის მონაწილეთა რაოდენობის შესახებ. No Kings-ის წინა პროტესტების მონაწილეთა რაოდენობაც, ანალოგიურად, მილიონებად ფასდებოდა".

ათასობით ადამიანი შეიკრიბა ნიუ-იორკის თაიმს-სკვერზეც, საიდანაც მანჰეტენის ცენტრალური ნაწილისკენ დაიძრნენ. მსახიობმა და რეჟისორმა რობერტ დე ნირომ, რომელიც ნიუ-იორკის აქციას ესწრებოდა, BBC-ის ჟურნალისტ ტომ ბრუკს განუცხადა, რომ ტრამპის წინააღმდეგ ქუჩაში გამოსვლა აუცილებლობად მიაჩნია.

"ვფიქრობ, უფრო მეტი ადამიანი ხედავს, რომ ამ ტიპთან ერთად მდგომარეობა დღითიდღე უარესდება", — თქვა დე ნირომ ტრამპზე. "ახლა ომში ვართ. შემდეგი ნაბიჯი იქნება ის, რომ ის ჯარებს შეიყვანს. ის გიჟია. ყველაფერი მარტივადაა. ჩვენ მას და მის რეჟიმს უნდა დავუპირისპირდეთ, ჩვენ უბრალოდ უნდა ვიბრძოლოთ, იცით, მშვიდობიანად, მაგრამ უნდა გავუწიოთ წინააღმდეგობა. ჩვენ არჩევანი არ გვაქვს“.

საპროტესტო აქციებს არც ინციდენტების გარეშე ჩაუვლია.

• ლოს-ანჯელესში დააკავეს ორი პირი, რომლებმაც პოლიციის ოფიცრებს ცემენტის ბლოკები ესროლეს;
• ლოს-ანჯელესში დააკავეს რამდენიმე ადამიანი მას შემდეგ, რაც ფედერალურ ციხესთან გამართული აქციის დაშლაზე უარი თქვეს;
• რამდენიმე ადამიანი დააპატიმრეს დალასშიც, მას შემდეგ რაც კონტრ-პროტესტანტებმა ხელი შეუშალეს მსვლელობას

აქციებთან დაკავშირებით პრეზიდენტი ამბობს, რომ მისი ნაბიჯები აუცილებელია და ბრალდებებს, თითქოს ის დიქტატორივით იქცევა, "ისტერიულს" უწოდებს. "ისინი მე მეფედ მომიხსენიებენ. მე არ ვარ მეფე", — განაცხადა მან ოქტომბერში Fox News-თან ინტერვიუში.

• "არა მეფეებს" — დონალდ ტრამპმა დაბადების დღეს აშშ-ს ქალაქებში საპროტესტო აქციები გაიმართა

ცნობისთვის, დემონსტრაციათა პირველი ტალღა 2025 წლის 14 ივნისს, პრეზიდენტ დონალდ ტრამპის 79-ე დაბადების დღესა და ვაშინგტონში გამართულ აშშ-ს არმიის სამხედრო აღლუმზე დაიწყო, ხოლო მეორე მასშტაბური აქცია ამავე სლოგანით გასული წლის ოქტომბერში გაიმართა.