საქართველოს მე-5 პრეზიდენტი სალომე ზურაბიშვილი და სხვა ოპოზიციონერი პოლიტიკოსები კოალიცია ცვლილებისთვის ერთ-ერთი ლიდერის, ელენე ხოშტარიას საქმეზე სასამართლოს გადაწყვეტილებას ეხმაურებიან.

ელენე ხოშტარიას კახა კალაძის საარჩევნო ბანერზე მარკერით "რუსული ოცნების" დაწერისთვის 1 წლითა და 6 თვით პატიმრობა მიესაჯა.

14 სექტემბერს, ელენე ხოშტარიამ კახი კალაძის ბანერზე დააწერა "რუსული ოცნება". ოპოზიციონერი ლიდერი 2025 წლის 15 სექტემბერს დააკავეს. პროკურატურა ხოშტარიას სხვისი ნივთის განზრახ დაზიანების ბრალდებით, 570 ლარის ოდენობის ზიანს ედავებოდა. მას თავდაპირველად 5 000-ლარიანი გირაო შეეფარდა, რის გადახდაზეც ხოშტარიამ უარი განაცხადა.

სალომე ზურაბიშვილი:

"ელენე ხოშტარიას ერთი წელი და ექვსი თვე არაფრისთვის… წარწერისთვის პლაკატზე, რაც მთელ მსოფლიოში ჩვეულებრივ აზრის გამოხატვის ფორმაა! როგორ გეშინიათ!"— წერს საქართველოს მეხუთე პრეზიდენტი სალომე ზურაბიშვილი.

თამარ ჩერგოლეიშვილი:

"ვინც ელენეს წელიწადნახევარი მიუსაჯა, იმ პირებმა საკუთარ თავს მიუსაჯეს სამუდამო,"— წერს პარტია ფედერალისტების ერთ-ერთი ლიდერი თამარ ჩერგოლეიშვილი.

ირაკლი კუპრაძე:

"ფლომასტერით პარტიულ ბანერზე გაკეთებული წარწერის გამო, ელენე ხოშტარიას, ქალ პოლიტიკოსს, 4 შვილის დედას, 1.5 წლით პატიმრობა მიუსაჯა ქართულმა ოცნებამ.
კი, სასამართლომ კი არა, არამედ ქართულმა ოცნებამ.

არსებობს ამ ქვეყანაში ვინმე, თუნდაც მათ მხარდამჭერებში, ვინც ამას ეთანხმება?," — წერს პარტია ძლიერი საქართველო — ლელოს ერთ-ერთი ლიდერი ირაკლი კუპრაძე.

სიმონ ჯანაშია:

"ეს დრო ისტორიას დაამახსოვრდება, როგორც მორალისგან დაცლილი, უგულო და უინტელექტო პოლიტიკის დრო. სამარცხვინოა, პოლიტიკოსს, ქალს, ელენე ხოშტარიას წელიწადნახევრით ციხეში რომ გამოკეტავ იმ საარჩევნო პლაკატზე წარწერის გაკეთებისთვის, რომელიც ერთ თვეში (და ზოგიერთის აზრით მაშინვე) ისედაც გადასაგდები გახდება.

ის რაც ელენემ გააკეთა იყო ნორმალური პოლიტიკური კულტურისთვის ჩვეულებრივი, დასაშვები სიმბოლური პოლიტიკური აქტი. ეს საქციელი ასევე იყო მორალური საქციელიც. ის სტუდენტს, მეგი დიასამიძეს გამოესარჩლა, რომელიც იგივე ბრალდებით და დიდი სპეცოპერაციის საფუძველზე თბილისიდან ბათუმში მიმავალი დააკავეს.

სიმბოლური პოლიტიკური აქტისთვის პოლიტიკოსის დაკავება ნიშნავს უპირველესად პოლიტიკის აკრძალვის სურვილს, პოლიტიკის წარმოების ფორმების განსაზღვრის უფლების მიტაცების მცდელობას, საკუთარი მოწინააღმდეგეების ნებისმიერ ფასად განადგურების სურვილს. მორალურად გამართლებული საქციელისთვის ადამიანების დასჯა კი უპირველესად საზოგადოების ღირებულებების წინააღმდეგ ბრძოლით უნდა ავხსნათ.
არ შევეგუებით! თავისუფლება რეჟიმის ყველა ტყვეს!", — წერს თავისუფლების მოედნის წევრი ჯანაშია სოციალურ ქსელში.

გიგა ლემონჯავა:

"ჩვენ ყველამ კარგად ვიცით, რომ სინამდვილეში არავითარი ფლომასტერი, როგორც რეალური საფუძველი ელენეს მიმართ პოლიტიკური დევნისა არ არსებობს. ელენეს წელიწადი და 6 თვე მიუსაჯეს იმის გამო, რომ არ აღიარა, არ ითანამშრომლა, წინააღმდეგობა გაუწია, გააკეთა ყველაფერი რუსული ბოროტი რეჟიმის დემონტაჟისთვის და რა თქმა უნდა, ამის კეთებას გააგრძელებს.

თუმცა, ასევე ეს არის ერთგვარი სიგნალი, მუქარა ყველასთვის ვინც გარეთ ვართ, ამაზე ჩვენი პასუხი არის შემდეგი, რასაც ელენეც იტყოდა, ჩვენ ადგილას რომ იყოს და ნებისმიერი ჩვენგანი იყოს ციხეში: ტყვეებით ვაჭრობა არ შედგება, ივანიშვილის რეჟიმის წინააღმდეგ გამარჯვება წარმოგვიდგენია, მისი ჩამოშლის გზით და ეს მომენტი აუცილებლად დადგება.
თავისუფლებისთვის, სამართლიანობისთვის, ამ ქვეყნის ჭეშმარიტი ევროპული მომავლისთვის ბრძოლას ივანიშვილი ვერ გააჩერებს ვერავითარი ციხით, ვერავითარი ციხის შიშით, ვერავითარი პოლიტიკური ანგარიშსწორებით," — განაცხადა პარტია დროას ერთ-ერთმა ლიდერმა, გიგა ლემონჯავამ.

გიორგი ვაშაძე:

"ამას ჩვენ უნდა დავუპირისპიროთ ყველა ის ადამიანი, ვინც ვფიქრობთ, რომ ასეთ უსამართლობაში ცხოვრება არ შეიძლება ქვეყანაში. უნდა დავდგეთ ერთად და ჩვენ ოპოზიციური ალიანსი სწორედ ამიტომ დავაფუძნეთ, ამისთვის არსებობს სხვადასხვა გაერთიანებები, საზოგადოებრივი ჯგუფები.

შევიკრათ ერთ მუშტად და მათ, იმ რამდენიმე ათეულ ადამიანს, რომელიც არის ამ ბოროტების მთავარი შემქმნელი და უსამართლობის წყარო, გავცეთ პასუხი ერთიანი ძალისხმევით," —განაცხადა პარტია სტრატეგია აღმაშენებლის ლიდერმა, გიორგი ვაშაძემ ჟურნალისტებთან საუბრისას.

შალვა ნათელაშვილი:

"ლეონარდოს მონა ლიზა, რომ დააზიანეს ლუვრში დამნაშავეს ადმინისტრაციულ სახდელი დაადეს, აი კახი კალაძის ბანერზე წარწერისათვის კი, ელენე ხოშტარიას ორ წლამდე ციხე მიუსაჯეს.გამოვდივარ წინადადებით — დაიკიდოს კალაძის პორტრეტი ლუვრში მონა ლიზას თავზე," — წერს ლეიბორისტული პარტიის ლიდერი, შალვა ნათელაშვილი.

კახა კუკავა:

"მიუხედავად ელენე ხოშტარიას, მის პიროვნების და პოლიტიკური საქმიანობის მიმართ მკვეთრად უარყოფითი დამოკიდებულებისა, ეს სასამართლო გადაწყვეტილება არის მართლმსაჯულებაზე თავლაფის დასხმა, მხედრიონის დროს არ იღებდა სასამართლო ასეთ გადაწყვეტილებებს.

ამ მოსამართლემაც და მისი კლანის ყველა წევრმა თავის დროზე პასუხი უნდა აგოს სისხლის სამართლის წესით," — წერს პარტია თავისუფალი საქართველოს ლიდერი კახა კუკავა.

დიმიტრი ცქიტიშვილი:

"რეჟიმი იმიტომ კი არ არის რუსული, ელენემ რომ დაწერა, არამედ ამ "კრიმინალზე" თქვენი რეაქციის გამო ხართ რუსულები. საკუთარი ხელით საკუთარ სახეზე დაიჯღაბნეთ თქვენი რუსულობა", — წერს ოპოზიციონერი პოლიტიკოსი დიმიტრი ცქიტიშვილი სოციალურ ქსელში.

საბა ბუაძე:

"საინტერესოა რა ტრიალებს შენს თავში, როდესაც დედაქალაქის მერი ხარ და შენს ბანერზე წარწერის გაკეთების გამო ქალს და ოთხი შვილის დედას 1 წელი და 6 თვე პატიმრობას უსჯიან.

ჩემი მხარდაჭერა ელენე ხოშტარიას!", — წერს ოპოზიციონერი პოლიტიკოსი საბა ბუაძე სოციალურ ქსელში.

თეონა ჭალიძე:

"ბიძინა ივანიშვილის პირადი პატიმარია ელენე ხოშტარია. ოთხი შვილის დედა. პირველი ქალი პოლიტიკოსი პოლიტპატიმარი. რას ეტყვის ქმარს, ასევე ოთხი შვილის დედა ეკატერინე ხვედელიძე ქალთა ციხეში ტყვეობაში დატოვებულ შეუპოვარ ქალზე?!" — წერს ოპოზიცონერი პოლიტიკოსი თეონა ჭალიძე.