ევროპარლამენტარები "იმედის", "რუსთავი 2"-ის და POSTV-ის სანქცირებას გეგმავენ.
"ტვ პირველის" ცნობით, ევროპის სახალხო პარტიის (EPP) დეპუტატები სამთავრობო პროპაგანდისტულ ტელევიზიებს რუსული დეზინფორმაციის გავრცელებაში ამხელენ და ევროკავშირისგან რეაგირებას ითხოვენ.

ინიციატივა ეკუთვნის EPP-ის სამ წევრს: კშიშტობ ფრეიზას, მიხალ შჩერბას და ანდრეი ჰალიცკის. მათ შესაბამისი შესწორებები რასა იუკნევიჩიანეს მიერ საქართველოს შესახებ მომზადებულ ყოველწლიურ ანგარიშში შეაქვთ. თუ წინადადება საბოლოოდ დადასტურდება, ეს ტექსტი ევროპარლამენტის წლიურ ანგარიშში ჩაიწერება, რომელსაც ევროპელი პოლიტიკოსები კენჭს მაისის ბოლოს უყრიან.

შესწორების მიხედვით, "ევროპარლამენტი მკაცრად გმობს ტელეკომპანიების, "იმედის", "რუსთავი 2"-ისა და POSTV-ის მიერ გავრცელებულ სისტემურ დეზინფორმაციას, ცილისმწამებლურ კამპანიებსა და მტრულ პროპაგანდას, რომლებიც მოქმედებენ როგორც „ქართული ოცნების“ რეჟიმის დე ფაქტო საკომუნიკაციო ფრთა და არა როგორც დამოუკიდებელი მედიასაშუალებები; გმობს ევროკავშირის ინსტიტუტებზე, ევროკავშირის ოფიციალურ პირებსა და საქართველოში ევროკავშირის ელჩზე, პაველ ჰერჩინსკიზე განხორციელებულ არაერთგზის თავდასხმას, მათ შორის ცილისმწამებლურ ნარატივებს, მანიპულაციურ გაშუქებასა და კოორდინირებულ მცდელობებს ევროკავშირისა და მისი წარმომადგენლების მიმართ საზოგადოებრივი ნდობის შელახვის მიზნით;
ხაზს უსვამს, რომ დეზინფორმაციის მიზანმიმართული გავრცელება, დიპლომატიური წარმომადგენლების წინააღმდეგ წაქეზება და ანტიევროპული ნარატივების ორკესტრირება ვერ ჩაითვლება კეთილსინდისიერ ჟურნალისტიკად, რომელიც დაცულია მედიის თავისუფლებით, რომ ეს არის პოლიტიკური პროპაგანდა, რომელიც მიზნად ისახავს ავტორიტარული კონტროლის განმტკიცებას და საქართველოს იზოლაციას მისი ევროპული გზიდან; აღნიშნავს, რომ ასეთი ქმედებები პირდაპირ ეწინააღმდეგება საქართველოს, როგორც ევროკავშირის კანდიდატი ქვეყნის ვალდებულებებს და ძირს უთხრის პლურალიზმის, დემოკრატიული ანგარიშვალდებულებისა და გამოხატვის თავისუფლების პრინციპებს;
მოვუწოდებთ ევროკავშირის ინსტიტუტებსა და წევრ ქვეყნებს, განიხილონ შესაბამისი და პროპორციული შემზღუდავი ზომები იმ ფიზიკური და იურიდიული პირების წინააღმდეგ, რომლებიც პასუხისმგებელნი არიან ამ დეზინფორმაციული კამპანიების ორკესტრირებასა და დაფინანსებაზე, მათ შორის ევროკავშირის ადამიანის უფლებათა გლობალური სანქციების რეჟიმის ფარგლებში, იმ შემთხვევაში, თუ მსგავსი მტრული აქტივობები გაგრძელდება".

შეგახსენებთ, რომ დიდმა ბრიტანეთმა პროპაგანდისტულ "იმედს" და POSTV-ის სანქციები 24 თებერვალს დაუწესა.