ბელარუსის პრეზიდენტმა, ალექსანდრე ლუკაშენკომ 250 პოლიტიკური პატიმრის გათავისუფლების განკარგულება გასცა. ამის შესახებ ინფორმაციას AP ავრცელებს.

ეს გადაწყვეტილება ვაშინგტონთან დადებული შეთანხმების ნაწილია, რომლის საფუძველზეც აშშ-მა გარკვეული სანქციები გააუქმა. აღნიშნული ნაბიჯი ლუკაშენკოს დასავლეთთან ურთიერთობების გაუმჯობესების მცდელობის ბოლო ეტაპია.

ლუკაშენკომ პატიმრები მას შემდეგ შეიწყალა, რაც მინსკში აშშ-ის პრეზიდენტის, დონალდ ტრამპის საგანგებო წარმომადგენელს ბელარუსის საკითხებში, ჯონ კოულს შეხვდა. კოულმა პატიმართა გათავისუფლებას "მნიშვნელოვანი ჰუმანიტარული ეტაპი" უწოდა და აღნიშნა, რომ ეს ტრამპის "პირდაპირი და პრინციპული დიპლომატიის" შედეგია. ეს ქვეყნის ისტორიაში პოლიტპატიმრების ერთჯერადად გათავისუფლების ყველაზე მასშტაბური შემთხვევაა.

კოულმა ჟურნალისტებს განუცხადა, რომ აშშ სანქციებს მოუხსნის ბელარუსის ორ სახელმწიფო ბანკსა და ფინანსთა სამინისტროს, ასევე სანქციების სიიდან ამოიღეს ბელარუსის კალიუმის მარილის უმსხვილესი მწარმოებლები.