საპატრიარქო ტახტის მოსაყდრე, სენაკისა და ჩხოროწყუს მიტროპოლიტის, შიოს (მუჯირი) კომენტარს საქართველოს პატრიარქის მდგომარეობის შესახებ საქართველოს საპატრიარქოს საზოგადოებასთან ურთიერთობის სამსახური ავრცელებს.

მეუფე შიო ყველა მორწმუნეს მოუწოდებს, პატრიარქის ჯანმრთელობისთვის ილოცონ.

"როგორც საზოგადოებისთვის უკვე ცნობილი გახდა მისი უწმინდესობის და უნეტარესობის ჯანმრთელობის მდგომარეობა მოულოდნელად დამძიმდა, გადმოყვანილია რეანიმაციაში, ჩვენი ექიმები მაქსიმალურად ცდილობენ და ძალიან დიდ ყურადღებას იჩენენ, რომ მისი მდგომარეობა იყოს სტაბილური და ჩვენ იმედი გვაქვს, რომ ასეც იქნება, ღვთის შეწევით. ჩვენ გვინდა დღეს მოვუწოდოთ ჩვენს სამღვდელოებას, ჩვენ სამონაზვნო დასს, ყველა მორწმუნეებს განსაკუთრებით ვილოცოთ მისი უწმინდესობის და უნეტარესობის ჯანმრთელობისთვის, ვინაიდან ვიცით რაოდენ დიდი მნიშვნელობა აქვს მის ლოცვას, მის ზრუნვას ჩვენზე და მის ჯანმრთელობას," — ამბობს მეუფე შიო.

ჯანდაცვის უწყების ხელმძღვანელის, მიხეილ სარჯველაძის თქმით, ექიმების მხრიდან ყველაფერი გაკეთდა საიმისოდ, რომ რაც შეიძლება მეტად ყოფილიყო უზრუნველყოფილი პაციენტის უსაფრთხოება.

"ექიმების მხრიდან ყველაფერი გაკეთდა საიმისოდ, რომ რაც შეიძლება მეტად ყოფილიყო უზრუნველყოფილი პაციენტის უსაფრთხოება. უკლებლივ ყველაფერი გაკეთდა ამისთვის, რა თქმა უნდა, ასაკის და ყველა ფაქტორის გათვალისწინებით ვითარება მარტივი ნამდვილად არ არის. ამჟამად პაციენტი იმყოფება ინტენსიური თერაპიის განყოფილებაში და მიმდინარეობს დაკვირვებაც და ყველა საჭირო ღონისძიების გატარება საიმისოდ, რომ რაც შეიძლება სწრაფად იყოს უზრუნველყოფილი სასიცოცხლოდ მნიშვნელოვანი ყველა პარამეტრი. დაკვირვება გაგრძელდება", — აცხადებს მიხეილ სარჯველაძე სამთავრობო ტელეკომპანია "იმედთან" საუბრისას.

კავკასიის მედიცინის ცენტრის დირექტორის, სოფიო ასპანიძის თქმით, "პატრიარქი შემოყვანილია კუჭიდან მასიური სისხლდენით, მას ჩაუტარდა შესაბამისი სამკურნალო დიაგნოსტიკური პროცედურები. მოთავსებულია კრიტიკული რეანიმაციის დეპარტამენტში. მდგომარეობა საყურადღებოა, ჰემოდინამიკა არასტაბილური გვაქვს" (ტელეკომპანია "იმედი").

ცნობისათვის, საქართველოს საპატრიარქოს ცნობით, "ჯანმრთელობის მდგომარეობის მოულოდნელი გართულების გამო საქართველოს კათოლიკოს-პატრიარქი ილია II ამჟამად კავკასიის მედიცინის ცენტრში იმყოფება".