თბილისის მერობის კანდიდატები ქართული ოცნებიდან კახა კალაძე და პატრიოტთა ალიანსიდან ირმა ინაშვილი On.ge-ს ინტერვიუზე არ თანხმდებიან.

კახა კალაძის პრესსამსახურს On.ge-ს ჟურნალისტი ორ თვეზე მეტი ხანია, რაც ინტერვიუზე უთანხმდება, თუმცა უშედეგოდ. საწყის ეტაპზე მერობის კანდიდატის ოფისში ამბობდნენ, რომ ინტერვიუ საარჩევნო პროგრამის პრეზენტაციამდე არ შედგებოდა, მოგვიანებით კი აღნიშნეს, რომ ინტერვიუზე კალაძის თანხმობა არ არსებობდა. პრესსამსახურს იმ საკითხების ჩამონათვალიც ეცნობა, რასთან დაკავშირებითაც იგეგმებოდა ინტერვიუ. კალაძეს ამ პერიოდის განმავლობაში არაერთი ინტერვიუ აქვს მიცემული სხვადასხვა მედიასაშუალებისთვის.

პატრიოტთა ალიანსის პრესსამსახურში თავიდანვე განაცხადეს, რომ ინაშვილი On.ge-სთან ინტერვიუს არ გეგმავდა. თუმცა, მერობის კანდიდატს ჟურნალისტი პირადად ესაუბრა, მისგან ინტერვიუზე თანხმობაც მიიღო. შეთანხმების შემდეგ ირმა ინაშვილი სატელეფონო ზარებს აღარ პასუხობს.

წინასაარჩევნო პერიოდში On.ge ნაციონალური მოძრაობის კანდიდატს - ზალიკო უდუმაშვილს, ევროპული საქართველოს კანდიდატს - ელენე ხოშტარიასა და დამოუკიდებელ კანდიდატს - ალეკო ელისაშვილს ესაუბრა.