ოცნების პარლამენტის თავმჯდომარე შალვა პაპუაშვილი საქართველოს მოქალაქეებისთვის უვიზო რეჟიმის შეჩერებაზე ევროკომისიის პრეზიდენტის, ურსულა ფონ დერ ლაიენის განცხადებას გამოეხმაურა.

პაპუაშვილმა ბრიფინგზე განაცხადა, რომ " ჩამოვიდნენ აქ, ხინკალიც ჭამეს, ხაჭაპურიც, ქართლის დედასაც შეხედეს და ვეფხისტყაოსანიც ორი სტროფი წაიკითხეს, აი, ეს ყველაფერი გააკეთეს და გონზე არ არიან, ვისთან აქვთ საქმე, რომ შეიძლება ქართველ ხალხს უთხრან, ვიზა გინდა თუ თავისუფლებაო?"

"ვფიქრობ ასეთი განცხადებები კარგია, რადგან დავინახოთ რასთან გვაქვს საქმე. სინამდვილეში ევროკავშირის ხელმძღვანელობა ჩვეულებრივი "შანტაჟიორები" არიან, რომლებიც მთელ ერს აშანტაჟებენ. და აშანტაჟებენ რისთვის? დღეს საქართველოს ხელისუფლებაში არ არის ის ხალხი, რომელიც თვითონ უნდოდათ ყოფილიყო. [...]

35 წელია გაგვიცნეს. მას შემდეგ, რაც ეს "რკინის ფარდა" ჩამოიშალა, ჩამოვიდნენ აქ, ხინკალიც ჭამეს, ხაჭაპურიც, ქართლის დედასაც შეხედეს და ვეფხისტყაოსანიც ორი სტროფი წაიკითხეს, აი, ეს ყველაფერი გააკეთეს და გონზე არ არიან, ვისთან აქვთ საქმე, რომ შეიძლება ქართველ ხალხს უთხრან, ვიზა გინდა თუ თავისუფლებაო?

პირველი ხომ არ იქნება ევროკავშირი, ვინც ეს გვითხრა — ჩვენ ვიზები ჩაგვიკეტეს ჩვენი დამოუკიდებლობის სხვადასხვა პერიოდში, ეკონომიკური სანქციებიც დაგვიწესეს, ვიზაც გაგვიუქმეს და ასე შემდეგ. სწორედ ასე: თავისუფლება გინდა თუ ვიზაო — აი, რა გზაზე დგას დღეს ევროკავშირი ამ ხელმძღვანელობის ხელში, რომ ფიქრობენ, რომ ხალხს შეიძლება არჩევანი დაუყენო თავისუფლებასა და ვიზას შორის და იფიქრო, რომ ეს ხალხი აირჩევს ვიზას. აი რა წარმოდგენა აქვთ ხალხზე. რომელი საუკუნის ევროპაა, რომ ჩავლენ იქ გემიდან ჩამოვლენ დახვდებათ იქ რაღაც უცხო ტომი, რომელსაც ეტყვიან შენ სასმელს მოგცემ და ამის [საფასურად] მთელ ოქროულობას წამოიღებემ. ასე რომ აცურებდნენ ხალხებს ეგ პერიოდი წავიდა," — განაცხადა პაპუაშვილმა.

შეგახსენებთ, 26 თებერვალს, ევროკომისიის პრეზიდენტმა, ურსულა ფონ დერ ლაიენმა 8 ოპოზიციონერი პოლიტიკოსის წერილს უპასუხა. მათ წერილი 2025 წლის სექტემბერშ გაგზავნეს, როდესაც პოლიტიკოსების ნაწილი პატიმრობაში იმყოფებოდა.

ლაიენი საპასუხო წერილში მადლობას უხდის პოლიტიკოსებს და საქართველოში მიმდინარე მოვლენების შესახებ შეშფოთებას გამოხატავს. ის წერს, რომ "თუ საქართველოს ხელისუფლება პრობლემებს არ მოაგვარებს, ვიზების შეჩერება შეიძლება, მთელ მოსახლეობაზე გავრცელდეს".