საავტომობილო გზების დეპარტამენტის განცხადებით, E70 ავტომაგისტრალის გრიგოლეთი-ქობულეთის შემოვლითი გზის მონაკვეთის მშენებლობისთვის გამოცხადებული საერთაშორისო ტენდერის, ტექნიკური და ფინანსური წინადადებები გაიხსნა.

გრიგოლეთი-ქობულეთის გზის 14,4 კმ-იანი მონაკვეთის მშენებლობას ევროპის საინვესტიციო ბანკი აფინანსებს. პროექტის განხორციელების ვადები 2018-2020 წლებია.

უწყების განმარტებით, მშენებლობის პროექტი, 4-ზოლიანი ასფალტ-ბეტონის გზის, 22 სახიდე გადასასვლელის, ოთხი სატრანსპორტო კვანძის, წყალგამტარი მილების და მიწისქვეშა გასასვლელების მშენებლობას ითვალისწინებს.

პროექტით დაგეგმილია, რომ ახალი საავტომობილო გზის მშენებლობამ უნდა უზრუნველყოს მაღალი ინტენსივობის საერთაშორისო მნიშვნელობის გზაზე მზარდი სატრანსპორტო ნაკადების გამტარუნარიანობა.

გრიგოლეთი-ფოთისა და გრიგოლეთი-ქობულეთის მონაკვეთების საშუალებით სამტრედია-გრიგოლეთის გზა, ქობულეთის შემოვლით გზას გრიგოლეთიდან ორი მიმართულებით დაუკავშირდება.