ერიკ დეინის გარდაცვალების შემდეგ, ცნობილი გახდა, რომ მსახიობს ეკრანებზე კიდევ ერთხელ, Euphoria-ს მესამე სეზონში ვიხილავთ.

HBO-ს გავრცელებულ პრესსრელიზში ნათქვამია, რომ მსახიობს ბოლოჯერ სერიალის მესამე სეზონში ვიხილავთ. მათი თქმით, მსახიობი გადაღების პარალელურად, ამიოტროფული ლატერალური სკლეროზის მძიმე სიმპტომებს ებრძოდა.

"დამწუხრებულები ვართ ერიკ დეინის უეცარი გარდაცვალების გამო. დეინი შესანიშნავი მსახიობი იყო", — ვკითხულობთ HBO-ს მიერ გავრცელებულ პოსტში — "HBO-ს ჰქონდა იმის შესაძლებლობა, რომ მასთან ბოლოჯერ, Euphoria-ს მესამე სეზონისთვის, ემუშავა".

ახალ სეზონში მონაწილეობაზე თავად მსახიობმა ჯერ კიდევ გასული წლის ივნისში ისაუბრა. დეინმა აღნიშნა, რომ მას ძალიან უხაროდა სერიალის მესამე სეზონში, კალ ჯეიკობსის როლში, დაბრუნება.

"გადაღების პროცესში ვართ, მხოლოდ ეს შემიძლია გითხრათ", — განუცხადა მსახიობმა Extra-ს.

ფოტო: HBO

2025 წლის აპრილში მსახიობმა ღიად ისაუბრა, თუ როგორ ებრძოდა ამიოტროფულ ლატერალურ სკლეროზს (ლუ გერიგის დაავადება). ეს უკანასკნელი პროგრესული, ხშირად კი ფატალური ნეიროდეგენერაციული დაავადებაა, რომელიც კუნთების დასუსტებასა და მათ სრულ კვდომას იწვევს

დაავადებასთან ბრძოლის შემდეგ, სამწუხაროდ, მსახიობი 2026 წლის 19 თებერვალს, 53 წლის ასაკში, გარდაიცვალა.

ფოტო: Eddy Chen/HBO

რაც შეეხება Euphoria-ს მესამე სეზონს, სერიალის მთავარ შემადგენლობას მესამე სეზონშიც ვიხილავთ, მათ შორის არიან — ზენდეია, სიდნი სვინი, ჯეიკობ ელორდი, ჰანტერ შაფერი, ალექსა დემი, და სხვები.

ამ სეზონში ვერ ვიხილავთ ფეზკოს როლის შემსრულებელ მსახიობ, ანგუს კლაუდს. ის, სამწუხაროდ, 2023 წლის 31 ივლისს, ნარკოტიკული ნივთიერებების შემთხვევითი ზედოზირებით გარდაიცვალა.

შეგახსენებთ, რომ Euphoria-ს მესამე სეზონს, HBO-ზე, 2026 წლის 12 აპრილს ვიხილავთ.