აშშ-ის სახელმწიფო დეპარტამენტი ონლაინ პორტალს ქმნის, რომელიც ევროპასა და სხვა რეგიონებში მცხოვრებ ადამიანებს საშუალებას მისცემს, თავიანთი მთავრობების მიერ აკრძალული კონტენტი, მათ შორის სავარაუდო სიძულვილის ენა და ტერორისტული პროპაგანდა ნახონ. ამის შესახებ ინფორმაციას Reutes ავრცელებს.

Reuters-ის წყაროების თანახმად, საიტი განთავსდება მისამართზე freedom.gov. ერთ-ერთმა წყარომ აღნიშნა, რომ ოფიციალური პირები განიხილავდნენ VPN ფუნქციის დამატებასაც, რათა მომხმარებლის ტრაფიკი ისე გამოჩნდეს, თითქოს ის აშშ-დან მოდის. ასევე ითქვა, რომ საიტზე მომხმარებელთა აქტივობა არ გაკონტროლდება.

პროექტს, რომელსაც საზოგადოებრივი დიპლომატიის საკითხებში სახელმწიფო მდივნის მოადგილე, სარა როჯერსი ხელმძღვანელობს, მიუნხენის უსაფრთხოების გასული კვირის კონფერენციაზე ელოდნენ, თუმცა მისი წარდგენა გადაიდო. Reuters-მა ვერ დაადგინა დაგვიანების ზუსტი მიზეზი, თუმცა ორმა წყარომ აღნიშნა, რომ სახელმწიფო დეპარტამენტის ზოგიერთმა თანამშრომელმა, მათ შორის იურისტებმა, გეგმასთან დაკავშირებით შეშფოთება გამოთქვეს.

როგორც Reuters წერს, ამ პროექტმა შესაძლოა კიდევ უფრო დაძაბოს ურთიერთობა ტრამპის ადმინისტრაციასა და აშშ-ის ტრადიციულ ევროპელ მოკავშირეებს შორის, რაც სავაჭრო დავების, უკრაინაში რუსეთის ომისა და პრეზიდენტ დონალდ ტრამპის მიერ გრენლანდიაზე კონტროლის დამყარების მცდელობის გამო ისედაც გამწვავებულია.

სახელმწიფო დეპარტამენტის წარმომადგენელმა Reuters-თან განაცხადა, რომ აშშ-ის მთავრობას არ აქვს კონკრეტულად ევროპისთვის განკუთვნილი ცენზურის გვერდის ავლის პროგრამა, თუმცა დაამატა: "ციფრული თავისუფლება სახელმწიფო დეპარტამენტის პრიორიტეტია, რაც მოიცავს კონფიდენციალურობისა და ცენზურის გვერდის ავლის ტექნოლოგიების გავრცელებას, როგორიცაა VPN-ები". მან ასევე უარყო ინფორმაცია ანონსის გადადებისა და იურისტების მხრიდან გამოთქმული პრეტენზიების შესახებ.

ვაშინგტონში ევროკავშირის დელეგაციას აშშ-ის გეგმებთან დაკავშირებით კომენტარი ჯერ არ გაუკეთებია.