როგორც ჩანს, ზენდეიას პირველ შეხვედრაზე რობერტ პატინსონზე მცდარი წარმოდგენა შეექმნა. ახალ ინტერვიუში, სადაც ერთმანეთს ზენდეია და პატინსონი ესაუბრებიან, მსახიობებმა თავიანთ ახალ ფილმზე ისაუბრეს (The Drama) და ასევე განიხილეს, როგორ ჰქონდა ზენდეიას საქმროს, ტომ ჰოლანდს, სრულიად განსხვავებული წარმოდგენა ბინდის ვარსკვლავზე.

ზენდეია და რობერტ პატინსონი Interview Magazine-სთვის

ფოტო: Interview Magazine / Nadia Lee Cohen

"სიმართლე გითხრა, თავიდან საერთო მეგობრების საშუალებით გაგიცანი, და შენ ყოველთვის საკმაოდ ჩუმი და მშვიდი იყავი, რაც ახლა უკვე ცოტა განსხვავდება იმ გამოცდილებისგან, რაც შენთან მაქვს", — უთხრა ზენდეიამ პატინსონს — "მაშინ ბევრს არ ლაპარაკობდი და მე ვიფიქრე: 'უი, რა იდუმალია!' მერე ტომს ველაპარაკე და მან მითხრა, 'არა, ის ძალიან მხიარულია, სულ იცინის და ხუმრობს', მე კი ძალიან გამიკვირდა, რომ ჯერ არ მინახავს მისი ეს მხარე".

"რა სევდიანია.. ნეტავ შემეძლოს მაგ იდუმალ სამყაროში დარჩენა. არაერთხელ შევამჩნიე, რომ თუ უბრალოდ არ ლაპარაკობ, ხალხი ფიქრობს: 'ვაუ, რა საშიში პიროვნებაა', მაგრამ მე უბრალოდ არ შემიძლია ამის შენარჩუნება", — თქვა პატინსონმა.

"გარკვეული ხნით მაინც შეინარჩუნე, სანამ ერთად რამდენიმე ფილმს გადავიღებდით", — უპასუხა ზენდეიამ.

რობერტ პატინსონი და ზენდეია Interview Magazine-სთვის

ფოტო: Nadia Lee Cohen / Interview Magazine

მსახიობები წელს ერთად სამ ფილმში მონაწილეობენ: The Drama, Dune: Part Three და The Odyssey, სადაც ასევე ტომ ჰოლანდიც თამაშობს.

ზენდეია და ჰოლანდი 4-წლიანი ურთიერთობის შემდეგ 2025 წლის იანვარში დაინიშნენ, ჰოლანდი და პატინსონი დიდი ხნის მეგობრები არიან და ერთად ითამაშეს 2020 წლის Netflix-ის დრამაში The Devil All the Time. გასულ წელს ჰოლანდმა GQ-სთან საუბარში მათი მეგობრობაც გაიხსენა.

"რობი სიკვდილამდე მიყვარს, ის ჩემი კარგი მეგობარია. ახლახან კიდევ ერთი ფილმი გადავიღეთ ერთად", — თქვა ჰოლანდმა.

რაც შეეხება პატინსონის შთაბეჭდილებას ზენდეიაზე, მსახიობმა პასუხი ცოტა შეაყოვნა.

"შენზე ჩემი შთაბეჭდილება? იცი რა… არ ვიცი, ეს ცოტა შეურაცხმყოფელი ხომ არ იქნება", — იხუმრა რობერტმა, — "აი, ხომ იცი ყოველთვის გეკითხებიან: 'გრძნობ თუ არა პასუხისმგებლობას, რომ შენი ფანებისთვის მაგალითი იყო?' მე მგონია, რომ ახალგაზრდებისთვის კარგი მაგალითი ხარ".