ყოფილმა ვიცეპრემიერმა ლევან დავითაშვილმა საქართველო 18 თებერვალს დატოვა. ამის შესახებ მან Bm.ge-სთან განაცხადა. ოცნების ყოფილი მაღალი მაღალჩინოსანი აცხადებს, რომ ქვეყნიდან საქმიანი ვიზიტის გამო გაემგზავრა და მიმდინარე კვირის ბოლოს დაბრუნდება.

"ჩვეულებრივ მიწევს ხოლმე საქმის გამო ვიზიტები. თითქმის ყოველ კვირას და ახლაც დაგეგმილი ვიზიტი მქონდა. კვირის ბოლოს ვბრუნდები, შემდეგ კვირას ისევ მიწევს წასვლა… რეალური ინფორმაცია ესაა", — განუცხადა დავითაშვილმა bm.ge-ს

ინფორმაციას იმის შესახებ, რომ ყოფილი ვიცეპრემიერი ლევან დავითაშვილი საქართველოში არ იმყოფება სახელმწიფო უსაფრთხოების სამსახურშიც დაადასტურეს.

შეგახსენებთ, რომ 17 თებერვალს საქართველოს ყოფილი ვიცეპრემიერი, ეკონომიკის, სოფლის მეურნეობის და გარემოს დაცვის მინისტრი ლევან დავითაშვილი და გაზისა და ნავთობის კორპორაციის ყოფილი გენერალური დირექტორი გიორგი ჩიქოვანი სუს-ში გამოკითხვაზე იმყოფებოდნენ.

როგორც NEWS.On.ge-ს სახელმწიფო უსაფრთხოების სამსახურში განუცხადეს, ლევან დავითაშვილი და გიორგი ჩიქოვანი სახელმწიფო უსაფრთხოების სამსახურის ანტიკორუფციულ სააგენტოში მიმდინარე გამოძიების ფარგლებში ერთ-ერთ მსხვილ ნავთობკომპანიასთან გაფორმებულ ხელშეკრულებასთან დაკავშირებით იკითხებოდნენ.

დაკითხვიდან გამოსულმა დავითაშვილმა განაცხადა, რომ სუს-ში კითხვები ევროპის გაზით მომარაგების საკითხში საქართველოს როლს ეხებოდა და საქართველოს გაზმომარაგებასთან დაკავშირებული ხელშეკრულებებიც განიხილეს.

"ალბათ, იცით, რომ რამდენიმე წელიწადია საქართველო აქტიურ როლს ასრულებს ევროპის გაზით მომარაგების საკითხში. კერძოდ, ჩვენ მნიშვნელოვანი წვლილი შეგვაქვს ევროპული ენერგეტიკული უსაფრთხოების საკითხში, ამაში ჩვენ ვთანამშრომლობთ აზერბაიჯანის რესპუბლიკასთან ერთად. ვფიქრობ, რომ ძალიან დეტალური და ამომწურავი ინფორმაცია მივეცი. შესაბამისად, ამას დასჭირდა დრო. ძალიან ლოგიკური კითხვები იყო. იყო კითხვები, ჩვენი აქტიური მონაწილეობა, მომარაგების კუთხით, რამდენად შეიძლება ქმნიდეს რისკებს, ან არ ქმნიდეს. აქედან გამომდინარე, ჩემთვის ძალიან ლოგიკური იყო, რომ ყველა ეს საკითხი ამომწურავად განგვეხილა. ეს არის ძირითადი საკითხი, რაც ჩვენ განვიხილეთ.

ასევე, ჩვენ განვიხილეთ ის, რომ მომავალში საქართველოში როგორ მოხდეს სტაბილურად გაზმომარაგება. ჩვენ გვაქვს ხელშეკრულებები, რომელსაც ვადები აქვს. გარკვეული ხელშეკრულებები გრძელვადიანად გარანტირებული გვაქვს, ხოლო გარკვეული ხელშეკრულებების გაგრძელებაა საჭირო და გადახედვაა საჭირო, ეს საკითხებიც განვიხილეთ", —განაცხადა ლევან დავითაშვილმა.

სუს-მა ამ ინფორმაციას "უზუსტობა" უწოდა და განმარტა, რომ დავითაშვილის მიერ მიცემულ ინტერვიუში ორი არსებითი უზუსტობაა — ის კონკრეტულ სისხლის სამართლის საქმეზე გამოკითხვაზე იმყოფებოდა და არა შეხვედრაზე. მათივე განმარტებით, გამოკითხვისას რისკებთან დაკავშირებული კითხვა ევროკავშირის გაზმომარაგებას არ ეხებოდა და ამ კუთხით რისკებზე გამოკითხვაში "ერთი სიტყვაც კი არ არის ნათქვამი".

"სუს-ის დატოვების შემდეგ ლევან დავითაშვილის მიერ მიცემულ ინტერვიუში ორი არსებითი უზუსტობაა:

დავითაშვილი ანტიკორუფციულ სააგენტოში იყო გამოკითხვაზე კონკრეტულ სისხლის სამართლის საქმეზე და არა შეხვედრაზე, აქ საკითხები რომ განეხილა.

გამოკითხვისას რისკებთან დაკავშირებული კითხვა საქართველოს გაზმომარაგებას და დადებული ხელშეკრულებით საქართველოსთვის პირობების გაუარესებას ეხებოდა, რაზეც მიმდინარეობს გამოძიება და არა ევროკავშირის გაზმომარაგებას — ამ კუთხით რისკებზე გამოკითხვაში ერთი სიტყვაც კი არ არის ნათქვამი!

თუ კიდევ იქნება მსგავსი ინტერპრეტაცია, ცრუ ინფორმაცია ან სპეკულაცია აღნიშნულთან დაკავშირებით, ჩვენ მზად ვართ (გამოკითხული პირის თანხმობით) გამოკითხვის ოქმიც გავასაჯაროოთ", — აღნიშნავს სუსი.