ევროსაბჭოს გენერალური მდივანი ალენ ბერსე ევროპის საბჭოს წამების საწინააღმდეგო კომიტეტის (CPT) მიერ საქართველოს შესახებ გამოქვეყნებულ ანგარიშს სოციალურ ქსელში ეხმაურება.

მისი თქმით, ანგარიში სერიოზულ შეშფოთებას იწვევს და არასათანადო მოპყრობა არასდროს არის გამართლებული. ბერსე წერს, რომ მომავალ კვირას ის ამ საკითხს ადამიანის უფლებათა საბჭოზე ოცნების საგარეო საქმეთა მინისტრ მაკა ბოჭორიშვილთან დააყენებს.

"საქართველოზე CPT-ის დღევანდელი ანგარიში სერიოზულ შეშფოთებას იწვევს, მათ შორის 2024 წლის ბოლოს დემონსტრაციების დროს პოლიციის მხრიდან არასათანადო მოპყრობის ბრალდებებს. არასათანადო მოპყრობა არასდროს არის გამართლებული. ამ საკითხს მომავალ კვირას, ადამიანის უფლებათა საბჭოზე, საგარეო საქმეთა მინისტრ მაკა ბოჭორიშვილთან დავაყენებ. ევროპის საბჭო მზადაა მხარი დაუჭიროს რეფორმებს", — დაწერა ალენ ბერსემ.

შეგახსენებთ, საბჭოს წამების საწინააღმდეგო კომიტეტმა (CPT) საქართველოში 2024–2025 წლებში განხორციელებული ვიზიტის შესახებ ანგარიში გამოაქვეყნა.

CPT-ის ანგარიშში წერია, რომ 29 ნოემბრის აქციების შემდეგ დაკავებულებმა მასობრივი და მძიმე ძალადობის შესახებ განაცხადეს. ბევრს ჰქონდა ხილული ტრავმები, ზოგს გადაუდებელი სამედიცინო დახმარება დასჭირდა. ისინი აღწერდნენ, რომ ნიღბიანი პირები და პოლიციელები, რომლების იდენტიფიცირებაც ვერ ხდებოდა ჯგუფურად აკავებდნენ ხალხს, სცემდნენ, ემუქრებოდნენ და ძალადობას აგრძელებდნენ მაშინაც კი, როცა დაკავებულებს ხელბორკილები ედოთ. ძალადობა ჩვეულებრივ წყდებოდა, როცა ისინი უნიღბო პოლიციელებს გადაეცემოდნენ.