ტელეკომპანია "კავკასიის" დირექტორის, ნინო ჯანგირაშვილის განცხადებით, აშშ-ის მოქალაქის მიერ ტელეკომპანიისთვის ჩარიცხული თანხის გამო, კომუნიკაციების მარეგულირებელმა კომისიამ ადმინისტრაციული საქმის წარმოება დაიწყო. ამის შესახებ ჯანგირაშვილმა სოციალურ ქსელში დაწერა.

მისი განმარტებით, ტელეკომპანია "კავკასია" შემოწირულობებს იღებს და ანგარიშზე თანხებს სრულიად უცხო ადამიანები რიცხავენ. მისივე განმარტებით, " გრანტების ახალი კანონის ამოქმედების შემდეგ. ემიგრანტების გადმორიცხვებიც რეჟიმის რეპრესიებს დაექვემდებარება".

"რომ ვიცოდეთ სად ვართ. მოგეხსენებათ, კავკასია შემოწირულობებს იხვეწება, ღიად გვაქვს გამოცხადებული ჩვენი ანგარიში. გვირიცხავენ თანხებს სრულიად უცნობი ადამიანები, რაც განსაკუთრებით მიჩუყებს გულს. საუბარია ისეთ თანხებზე, იმედის პროპაგანდისტები ერთ ლანჩში რომ იხდიან. ხოდა, თურმე მარეგულირებელმა აღმოაჩინა, რომ ჩვენი ერთ–ერთი შემომწირველი აშშ–დან არის. მართლა არ ვიცი ვინ არის ეს ძვირფასი ადამიანი. გვარი და სახელი ქართული აქვს. შეიძლება ორმაგი მოქალაქეც არის. არ ვიცი სად უნდა გამოვიძიო. და აი, ამათ რა უნდა ვუპასუხო. შემომწირველს რა მომსახურება გავუწიე? რა ინვოისი გავუგზავნე? ან რაში დავხარჯე? ალბათ დენის ფული გადავიხადეთ ან ხელფასი გავისტუმრეთ. რა ვიცი. სხვა რა უნდა გვექნა ამ ფულით? ამათ უნდათ უბრალოდ დაგვღალონ, შეგვაშინონ რომ მოგვბეზრდეს ცხოვრება და აქედან წავიდეთ. ვერ მოესწრებით დოქსოფულოებო.

P.S. მთავარი ამ წერილით ნათქვამია: უცხოეთში მცხოვრები ქართველები "უცხო ძალად" ცხადდებიან. ბევრი რომ აღარ ვიმკითხაოთ, რა იქნება მომავალში, გრანტების ახალი კანონის ამოქმედების შემდეგ. ემიგრანტების გადმორიცხვებიც რეჟიმის რეპრესიებს დაექვემდებარება", — დაწერა ჯანგირაშვილმა.