2026 წლის 13-15 თებერვალს, ოცნების ხელისუფლების საგარეო საქმეთა მინისტრი, მაკა ბოჭორიშვილი მონაწილეობას მიიღებს მიუნხენის უსაფრთხოების რიგით 62-ე კონფერენციაში.

საგარეო უწყების ცნობით, კონფერენციის ფარგლებში, საგარეო უწყების ხელმძღვანელი შეხვედრებს გამართავს კოლეგა მინისტრებთან, საერთაშორისო ორგანიზაციების წარმომადგენლებთან და მონაწილეობას მიიღებს პანელურ დისკუსიაში.

ბოჭორიშვილის თქმით, კონფერენციის ფარგლებში ბევრი ღონისძიებაა დაგეგმილი, რომელთაგან ერთ-ერთი მიეძღვნება დაკავშირებადობას და შუა დერეფნის მნიშვნელობას ევროპის უსაფრთხოების კონტექსტში.

"მიუნხენის უსაფრთხოების კონფერენცია საქართველოსთვის არის შესაძლებლობა გვქონდეს კომუნიკაცია პარტნიორებთან, საინტერესო სტუმრებთან, კონფერენციის მონაწილეებთან და რა თქმა უნდა, ჩვენს პრიორიტეტებზე შესაძლებლობის ფარგლებში ვისაუბროთ იმაზე, თუ რა სურს საქართველოს, როგორ ხედავს საქართველო ევროპის უსაფრთხოებას, როგორ განვიხილავთ საკუთარ თავს ევროპის უსაფრთხოების ნაწილად და რა წვლილი შეაქვს საქართველოს სწორედ იმაში, რაზედაც მსჯელობა მიმდინარეობს დღეს ევროპაში და რამდენად მნიშვნელოვანია, რომ საქართველოს შეხედონ სერიოზულად და იყოს ის დამოკიდებულება, რაც შესაძლებელს გახდის უფრო სერიოზულ პარტნიორობას, რაც მიმართული იქნება როგორც ევროპის, ასევე თავად საქართველოს კეთილდღეობისკენ", — განაცხადა ბოჭორიშილმა ჟურნალისტებთან საუბრისას.