ყოფილი პრემიერმინისტრი, პარტია გახარია საქართველოსთვის თავმჯდომარე გიორგი გახარია 13-15 თებერვალს მიუნხენის უსაფრთხოების კონფერენციაში მიიღებს მონაწილეობას. ამის შესახებ ინფორმაცია გიორგი გახარიას პარტიამ საქართველოსთვის გაავრცელა. მათი ცნობით, კონფერენციაში ამერიკის შეერთებული შტატებისა და ევროკავშირის წევრი სახელმწიფოების უმაღლეს პოლიტიკური თანამდებობის პირებთან გამართავს შეხვედრებს.

"ყოფილი პრემიერმინისტრი, პარტია გახარია საქართველოსთვის თავმჯდომარე გიორგი გახარია 13-15 თებერვალს მიუნხენის უსაფრთხოების კონფერენციაში (MSC) მიიღებს მონაწილეობას, სადაც ამერიკის შეერთებული შტატებისა და ევროკავშირის წევრი სახელმწიფოების უმაღლეს პოლიტიკური თანამდებობის პირებთან გამართავს შეხვედრებს.

MSC არის მსოფლიოში ერთ-ერთი ყველაზე მნიშვნელოვანი საერთაშორისო ფორუმი, სადაც წელიწადში ერთხელ იკრიბებიან სახელმწიფოს მეთაურები გლობალური უსაფრთხოებისა და საგარეო პოლიტიკის საკითხებზე.

წელს კონფერენციაში, მსოფლიოს სხვა ლიდერებთან ერთად, მონაწილეობას იღებენ აშშ-ს სახელმწიფო მდივანი — მარკო რუბიო, გერმანიის კანცლერი — ფრიდრიხ მერცი, დიდი ბრიტანეთის პრემიერ-მინისტრი — კირ სტარმერი, საფრანგეთის პრეზიდენტი — ემანუელ მაკრონი, პოლონეთის პრემიერ-მინისტრი — დონალდ ტუსკი, ევროკომისიის პრეზიდენტი — ურსულა ფონ დერ ლაიენი და სხვები", — წერია გავრცელებულ ინფორმაციაში.

ცნობისათვის, 10 თებერვალს ოცნების პრემიერმინისტრმა, ირაკლი კობახიძემ ჟურნალისტებთან საუბრისას განაცხადა, რომ მთავრობამ მიუნხენის უსაფრთხოების კონფერენციის მოსაწვევი მიიღო. მისივე განმარტებით, თავად კონფერენციას არ დაესწრება და თუ რა ფორმით იქნება მთავრობა წარმოდგენილი კონფერენციაზე, ამას საზოგადოება მოგვიანებით გაიგებს.

"ჩვენი წარმომადგენელი იქნება მიუნხენის კონფერენციაზე. რა ფორმით იქნება მთავრობა წარმოდგენილი, ამაზე მოგვიანებით გაიგებს საზოგადოება. შეიძლება იყოს მაკა ბოჭორიშვილი. საზოგადოება გაიგებს ჩვენგან ამასთან დაკავშირებით, როცა იქნება საჭირო. მე არ ვიქნები მიუნხენის კონფერენციაზე. მთავრობამ მიიღო მოსაწვევი. მთავრობის წარმომადგენელი იქნება ამ კონფერენციაზე. ეს არის, რაც შემიძლია გითხრათ", — განაცხადა კობახიძემ.