Saber Interactive-ისა და Lionsgate-ის მიერ მზადდება ჯონ ვიკის ვიდეოთამაში, რომელშიც მთავარი როლის შემსრულებელი კიანუ რივზი საკუთარ პერსონაჟს გაახმოვანებს. ეს იქნება ერთმოთამაშიანი, მესამე პირის ხედვის მქონე თამაში.

თამაში აღწერილია როგორც AAA კატეგორიის (უმაღლესი კლასის, დიდი ბიუჯეტის მქონე) პროდუქტი, რომელიც "ზრდასრული აუდიტორიისთვისაა გათვლილი". ამჟამად ის მუშავდება PlayStation 5-ის, Xbox Series X-ისა და PC-სთვის. პროექტში ჩართულნი არიან ჯონ ვიკის ფილმების რეჟისორი ჩად სტაჰელსკი და თავად კიანუ რივზიც.

ჯონ ვიკის თამაში გააერთიანებს გმირის "გამორჩეულ, ადრენალინით სავსე საბრძოლო სტილს" და Saber-ის გამოცდილებას დინამიური და დამაინტრიგებელი სათამაშო გამოცდილებების შექმნაში.

კადრი თრეილერიდან

ფოტო: Lionsgate, Saber

თამაშში წარმოდგენილი იქნება ორიგინალური სიუჟეტი, რომელიც ჯონ ვიკის ქრონოლოგიაში Impossible Task-ამდე წლებით ადრე ვითარდება. ის გააფართოებს ფრენჩაიზის სამყაროს და მოიცავს როგორც გულშემატკივრებისთვის უკვე ნაცნობ პერსონაჟებს, ისე ახალ გმირებს, რომლებიც სპეციალურად ამ პროექტისთვის შეიქმნა.

"მოუთმენლად ველოდები, როდის შეძლებენ გულშემატკივრები ჯონ ვიკის როლში შესვლას და The High Table-ის მრავალგანზომილებიანი სამყაროს შესწავლას", — თქვა Lionsgate-ის გლობალური პროდუქტებისა და გამოცდილებების პრეზიდენტმა ჯენეფერ ბრაუნმა — "ჩვენ მჭიდროდ ვთანამშრომლობთ Saber-ის გუნდთან, რათა შევქმნათ თამაში, რომელიც სრულად ასახავს ფილმების შეუდარებელ მოქმედებას, უნიკალურ ქორეოგრაფიას, მდიდარ სამყაროსა და ავთენტურობას".

"ჯონ ვიკი კინოს ისტორიაში ერთ-ერთი ყველაზე გამორჩეული პერსონაჟია. Saber-ისთვის დიდი პატივია ჩადთან, კიანუსთან და Lionsgate-ის გუნდთან თანამშრომლობა, რათა ეს სამყარო მაღალი ხარისხის თამაშის ფორმატში გავაცოცხლოთ", — აღნიშნა Saber Interactive-ის აღმასრულებელმა დირექტორმა მეთიუ კარჩმა.

ნახეთ თამაშის თრეილერი:

ჯონ ვიკი ერთ-ერთი ყველაზე პოპულარული თანამედროვე ფრენჩაიზია, რომელშიც მთავარ როლს კიანუ რივზი ასრულებს. ფილმების სერია 2014 წელს დაიწყო და დღემდე გამოსულია 4 ფილმი, რომლებმაც მსოფლიო მასშტაბით მილიარდ დოლარზე მეტი შემოსავალი მოიტანეს და დიდი ფან-ბაზა შექმნეს. ფრენჩაიზი ცნობილია თავისი გამორჩეული ვიზუალური სტილითა და ქორეოგრაფიული ბრძოლებით.