ოცნების ხელისუფლების პრემიერმინისტრმა, ირაკლი კობახიძემ მთავრობის სხდომაზე განაცახდა, რომ სახელმწიფო უნივერსიტეტებში სტუდენტების მიღების კვოტები დღეს დამტკიცდება.

კობახიძემ შემდეგ დასძინა, რომ განათლების რეფორმით თსუ-ს "დაუბრუნდება დედა უნივერსიტეტის სტატუსი", რომელიც "წინა ხელისუფლების მმართველობის დროს დაკარგა".

"დღეს მთავრობა დაამტკიცებს სახელმწიფო უნივერსიტეტებში სტუდენტების მიღების კვოტებს, ეს კვოტები პირველად, დამოუკიდებლობის აღდგენის შემდეგ, დაეფუძნება შრომის ბაზრის სიღრმისეულ ანალიზს და განისაზღვრება ერთი ქალაქი — ერთი ფაკულტეტის პრინციპის შესაბამისად.

ამ ყველაფერზე დეტალურ ინფორმაციას საზოგადოებას წარუდგენს განათლების, მეცნიერების და ახალგაზრდობის მინისტრი გივი მიქანაძე, რომელიც დღეს გამართავს ბრიფინგს ამ თემასთან დაკავშირებით, შესაბამისად, მე დეტალურად არ ვისაუბრებ ამ საკითხზე. ხაზს გავუსვამ ამ რეფორმის ერთ-ერთ უმნიშვნელოვანეს შედეგს, რომელიც ამ კვოტებშიც არის ასახული თსუ-ს ამ რეფორმის შედეგად, დაუბრუნდება დედა უნივერსიტეტის მისია და სტატუსი, ის სტატუსი და მისია, რომელიც მან 90-იანი წლების პერიოდში განვითარებული მოვლენების შედეგად დაკარგა და უფრო მოგვიანებით, 2004-2012 წლებში, წინა ხელისუფლების მიზანმიმართული, მავნებლური ანტიეროვნული პოლიტიკის შედეგად დაკარგა. თსუ-ს უნდა დაუბრუნდეს დედა უნივერსიტეტის სტატუსი, შესაბამისი მისია და ერთ-ერთი მთავარი ამოცანა იმ რეფორმის რომელიც ჩვენ წამოვიწყეთ, არის, სწორედ, ეს.

მინდა, მადლობა გადავუხადო განათლების, მეცნიერების და ახალგაზრდობის მინისტრს გაწეული სამუშაოსთვის, ეს რეფორმა არის აუცილებელი იმისათვის, რომ ქართველმა ახალგაზრდებმა საქართველოში მიიღონ თანამედროვე სტანდარტების უმაღლესი განათლება, რასაც ჩვენ აუცილებლად უზრუნველვყოფთ და, სწორედ, ამას მიეძღვნება ჩვენი საქმიანობა მომავალი წლების განმავლობაში," — განაცხადა კობახიძემ.

შეგახსენებთ, ოცნების ხელისუფლების ახალი საკანონმდებლო ინიციატივით, ივანე ჯავახიშვილს სახელობის თბილისის სახელმწიფო უნივერსიტეტი და საქართველოს ტექნიკურ უნივერსიტეტი გაერთიანდება იგეგმებოდა, რაც ორ უნივერსიტეტში პროტესტის ფონზე ვერ განხორციელდა.

9 თებერვალს, კობახიძემ ბრიფინგზე განაცხადა, რომ "ორი უნივერსიტეტი — თსუ და სტუ აღარ გაერთიანდება". მისი თქმით, "საქართველოს ტექნიკური უნივერსიტეტში მომდევნო აკადემიური წლისთვის აღარ გამოცხადდება მიღება იმ დისციპლინებზე, რომლებიც 1990-იან წლებამდე არ შედიოდა პროგრამაში, შესაბამისად ტექნიკური პროფილის არმქონე სასწავლო პროგრამები ტექნიკურ უნივერსიტეტში დარჩება მილევად რეჟიმში".