რუსეთმა Meta Platforms-ის კუთვნილი WhatsApp-ის დაბლოკვა სცადა — ამის შესახებ კომპანიამ ოთხშაბათს განაცხადა, იმ ფონზე, როდესაც მოსკოვი უცხოურ ტექნოლოგიურ კომპანიებზე კონტროლს ამკაცრებს და საკუთარ "ეროვნულ მესენჯერს" უწყობს ხელს. ამის შესახებ ინფორმაციას Deutsche Welle ავრცელებს.

WhatsApp-ის წარმომადგენელმა თქვა, რომ ეს ნაბიჯი მიზნად ისახავს მომხმარებლების "სახელმწიფოს მფლობელობაში მყოფ სადაზვერვო აპზე" გადაყვანას.

Deutsche Welle წერს, რომ რუსეთის ხელისუფლება აქტიურად უჭერს მხარს სახელმწიფოს მიერ მხარდაჭერილ WhatsApp-ის ალტერნატივას — MAX-ს. კრიტიკოსები აცხადებენ, რომ ეს აპლიკაცია შეიძლება მომხმარებლების თვალთვალის საშუალებას იძლეოდეს, თუმცა სახელმწიფო მედია ამ ბრალდებებს ცრუ ინფორმაციად მიიჩნევს.

"ჩვენ ვაგრძელებთ ყველაფრის გაკეთებას, რაც შესაძლებელია, რათა მომხმარებლები ერთმანეთთან კავშირში დარჩნენ," — განაცხადა WhatsApp-მა კომენტარში.

კომპანიის ინფორმაციით, WhatsApp-ს რუსეთში დაახლოებით 100 მილიონი მომხმარებელი ჰყავს, ხოლო მსოფლიოში ყოველთიურად — 3 მილიარდი.

კრემლის პრესმდივანმა დიმიტრი პესკოვმა განაცხადა, რომ Meta-ს შეუძლია რუსეთში საქმიანობის განახლება, თუ იგი რუსულ კანონმდებლობას დაემორჩილება და ხელისუფლებასთან "დაიწყებს დიალოგს".

"მაშინ ჩვენ გვექნება შეთანხმების მიღწევის შესაძლებლობა," — თქვა პესკოვმა და დაამატა, რომ სხვა შემთხვევაში "არანაირი შანსი არ არსებობს".

ამასთან, გაზეთმა Financial Times-მა ადრე გაავრცელა ინფორმაცია, რომ რუსეთის ხელისუფლებამ WhatsApp იმ ონლაინ რეესტრიდან ამოიღო, რომელსაც რუსეთის კომუნიკაციების მარეგულირებელი უწყება — "როსკომნადზორი" მართავს.