"აშშ-ის ოფიციალური პირები საქართველოს სახელმწიფო უსაფრთხოების სამსახურის უფროსს სტანდარტული, სამუშაო ვიზიტის ფარგლებში შეხვდნენ", — საქართველოში აშშ-ს საელჩოს კომენტარს სუს-ის უფროსის, მამუკა მდინარაძის აშშ-ში ვიზიტის შესახებ "რადიო თავისუფლება" ავრცელებს.

"აშშ-ის ოფიციალური პირები საქართველოს სახელმწიფო უსაფრთხოების სამსახურის უფროსს უსაფრთხოების სფეროში თანამშრომლობაზე ორიენტირებული სტანდარტული, სამუშაო ვიზიტის ფარგლებში შეხვდნენ", — განაცხადეს საელჩოში.

ცნობისათვის, 11 თებერვალს, სახელმწიფო უსაფრთხოების სამსახურმა გაავრცელა ინფორმაცია იმის შესახებ, რომ სუს-ის უფროსი მამუკა მდინარაძე 7-10 თებერვალს აშშ-ში სამუშაო ვიზიტით იმყოფებოდა.

"სახელმწიფო უსაფრთხოების სამსახურის უფროსი 7-10 თებერვალს, თავისი კოლეგების მიწვევით, სამუშაო ვიზიტით ამერიკის შეერთებულ შტატებში იმყოფებოდა.

შეხვედრა უსაფრთხოების საკითხებთან დაკავშირებით გაიმართა", — წერია სუს-ის განცხადებაში.

მდინარაძის აშშ-ში ვიზიტზე საუბრისას დღეს ოცნების პარლამენტის თავმჯდომარემ, შალვა პაპუაშვილმა განაცხადა, რომ ის აშშ-ში ამერიკული მხარის მიწვევით იმყოფებოდა.

"სახელმწიფო უსაფრთხოების სამსახურის განცხადებაში მოცემულია, რა იყო ვიზიტის მიზანი, საფუძველი და რა იყო შინაარსი. ვიზიტი შეეხებოდა უსაფრთხოების სამსახურებს შორის თანამშრომლობას, განსაკუთრებით რეგიონის გამოწვევების გათვალისწინებით, რათა უსაფრთხოების თვალსაზრისით ორივე ქვეყნის ინტერესების განხორციელება იყოს უზრუნველყოფილი. როგორც კერძო ურთიერთობებშია, ასევეა სახელმწიფოს შორის ურთიერთობებში, რომ მასპინძელი იწვევს სტუმარს",— განაცხადა პაპუაშვილმა.

ცნობისათვის, 4 თებერვალს პარტია გახარია საქართველოსთვის წევრმა, გიგა ფარულავამ განაცხადა, რომ სახელმწიფო უსაფრთხოების სამსახურის უფროსი მამუკა მდინარაძე ამერიკის შეერთებულ შტატებში იმყოფება. იგივე თქვა პარტიის კიდევ ერთმა წევრმა, გიორგი შარაშიძემ. თუმცა მაშინ სუს-მა მათ მიერ გავრცელებული ინფორმაცია არ დაადასტურა.