არ მოგესმათ, რამდენადაც წარმოუდგენლად არ უნდა ჟღერდეს, უცნობმა წყვილმა ამერიკული ფეხბურთის მთავარი ჩემპიონატის, Super Bowl-ის, მუსიკალურ შესვენებაზე იქორწინა.

Super Bowl-ის რიგით მე-60 ჩემპიონატის მუსიკალურ შესვენებას პუერტორიკოელი მუსიკოსი, Bad Bunny, გაუძღვა. შოუ უამრავი სიურპრიზით იყო სავსე, მათ შორის, გამოჩნდნენ ისეთი ვარსკვლავები, როგორებიც არიან — ლეგი გაგა, პედრო პასკალი, ჯესიკა ალბა, Cardi B, Karol G, რიკი მარტინი და სხვები. თუმცა, შოუში ყველაზე მოულოდნელი უცნობი წყვილის ქორწინება იყო.

ფოტო: Getty Images

მოგვიანებით, მუსიკოსის გუნდმა პრესასთან საუბრისას აღნიშნა, რომ ქორწინება რეალური იყო და ინფორმაცია გაავრცელა, როგორ აღმოჩნდა წყვილი შოუში.

"წყვილმა Bad Bunny თავიანთ ქორწილში დაპატიჟა, თუმცა მუსიკოსმა ურჩია, რომ Apple Music-ის Halftime შოუში დაეწერათ ჯვარი. მომღერალი ფაქტობრივად მათი "მოწმე" იყო. წყვილმა ხელი მოაწერა და თან სადღესასწაულო ტორტიც დაჭრა", — განაცხადა Bad Bunny-ის გუნდმა.

ფოტო: Getty Images

როგორც ცნობილი გახდა, ტომი უოლტერი და ელი აპარიჩო თითქმის 3 წელია ერთად არიან, წყვილი ორი წლის წინ დაინიშნა. მათი გრანდიოზული საქორწინო ცერემონიის დასრულების შემდეგ, სცენაზე ლედი გაგა გამოჩნდა, რომელმაც Bad Bunny-სთან ერთად სიმღერა Die With a Smile შეასრულა.

მიუხედავად შოუს დადებითი გამოხმაურებებისა, საფეხბურთო ჩემპიონატის მაყურებლებს საერთოდ არ სურდათ, მუსიკალურ შესვენებაზე შემსრულებელი "არაამერიკელი" ყოფილიყო. ისინი ამბობდნენ, რომ მისი არჩევა დიდი შეცდომა იყო, ეს გადაწყვეტილება თავად ტრამპმაც კი გააკრიტიკა. ამის საპასუხოდ, Bad Bunny-მ შოუში ისეთ საკითხებზე გააკეთა აქცენტი, როგორებიცაა ამერიკელების (მათ შორის ლათინოამერიკელების) ერთობა და მეგობრობა".

ფოტო: X

რაც შეეხება მუსიკოსს, პუერტო-რიკოელმა მომღერლმა და რეპერმა გასულ წელს ახალი ალბომი — DeBÍ TiRAR MáS FOToS — გამოუშვა, რომელმაც გრემის 68-ე დაჯილდოებაზე წლის საუკეთესო ალბომის ნომინაციაში გაიმარჯვა.

ამჟამად, Bad Bunny მსოფლიო ტურნეზე იმყოფება, რომელმაც სათავე გასული წლის ნოემბერში აიღო და 2026 წლის 22 ივლისს, ბრიუსელში, ბელგიაში ჩატარებული კონცერტით დასრულდება.