Amnesty International-ის აღმოსავლეთ ევროპისა და ცენტრალური აზიის მიმართულების მოადგილე, დენის კრივოშეევი ქართული ოცნების მიერ გრანტების შესახებ კანონში დაანონსებულ ცვლილებას გამოეხმაურა. მისი თქმით, გრანტების შესახებ კანონში ცვლილება ავტორიტარული პრაქტიკის გაღრმავებაზე მიუთითებს და თუ კანონს მიიღებენ, არცერთი გრანტი აღარ იქნება დაშვებული მთავრობის წინასწარი ნებართვის გარეშე.

"მთავრობის მიერ შემოთავაზებული ცვლილებები გრანტების შესახებ კანონში უკიდურესად საზიანოა და საქართველოს ავტორიტარული პრაქტიკის გაღრმავებაზე მიუთითებს, რომლის მიზანი განსხვავებული აზრის ჩახშობა და ძალაუფლების გამყარებაა. ცვლილებები მნიშვნელოვნად აფართოებს "გრანტის" განსაზღვრებას და მასში პრაქტიკულად ნებისმიერი უცხოური ფული ან არამატერიალური დახმარება მოიაზრება — პოლიტიკური აქტივიზმიდან დაწყებული ანალიტიკური მუშაობითა და ექსპერტული კონსულტაციებით დამთავრებული — თუ ეს მთავრობას არ მოსწონს. თუ კანონს მიიღებენ, არცერთი გრანტი აღარ იქნება დაშვებული მთავრობის წინასწარი ნებართვის გარეშე, ხოლო ვინც ასეთ დახმარებას მიიღებს, შეიძლება ციხეში აღმოჩნდეს", — განაცხადა დენის კრივოშეევმა.

Amnesty International-ის აღმოსავლეთ ევროპისა და ცენტრალური აზიის მიმართულების მოადგილემ ასევე თქვა, რომ გრანტების შესახებ კანონის ცვლილება ღია მცდელობაა იმისა, რომ "საქართველოში პრაქტიკულად ყველაფერი, რაც დამოუკიდებელ სამოქალაქო საზოგადოებას, პოლიტიკურ ოპოზიციას და სახელმწიფოსგან დამოუკიდებელ საზოგადოებრივ ჩართულობას უკავშირდება, კრიმინალად გამოცხადდეს." მისივე განმარტებით, "საქართველოს ხელისუფლებამ უარი უნდა თქვას ამ საკანონმდებლო ინიციატივებზე და ქვეყნის კანონმდებლობა საერთაშორისო ადამიანის უფლებათა ვალდებულებებთან შესაბამისობაში მოიყვანოს.

"ეს არის ღია მცდელობა საქართველოში პრაქტიკულად ყველაფერი, რაც დამოუკიდებელ სამოქალაქო საზოგადოებას, პოლიტიკურ ოპოზიციას და სახელმწიფოსგან დამოუკიდებელ საზოგადოებრივ ჩართულობას უკავშირდება, კრიმინალად გამოცხადდეს.

უცხოური დაფინანსების, ანაზღაურების ან მატერიალური დახმარების მოძიება და მიღება სამოქალაქო საზოგადოების ფუნქციონირების საფუძველია და ეს საერთაშორისო სამართლის მიერ დაცული უფლებაა. საქართველოს ხელისუფლებამ უარი უნდა თქვას ამ საკანონმდებლო ინიციატივებზე და ქვეყნის კანონმდებლობა სრულად მოიყვანოს საერთაშორისო ადამიანის უფლებათა ვალდებულებებთან შესაბამისობაში — მათ შორის გაერთიანებისა და გამოხატვის თავისუფლების უფლებებთან", — აღნიშნა დენის კრივოშეევმა.

შეგახსენებთ, "გრანტების შესახებ" კანონში ცვლილებების თანახმად, ზუსტდება გრანტების განმარტება და განისაზღვრება, რომ გრანტად მიიჩნევა აგრეთვე სხვა სახელმწიფოს მოქალაქის ან სხვა სახელმწიფოს იურიდიული პირის მიერ საქართველოს მოქალაქისთვის ან საქართველოში ბინადრობის უფლების მქონე პირისათვის, ასევე იმ იურიდიული პირისათვის, რომლის საქმიანობა არსებითად საქართველოსთან დაკავშირებულ საკითხებზე აქტივობას მოიცავს, ფულადი ან ნატურალური ფორმით გადაცემული სახსრები, რომელიც ხმარდება, ან შეიძლება მოხმარდეს საქართველოს ხელისუფლებაზე, სახელმწიფო დაწესებულებებზე, ან საზოგადოების ნებისმიერ ნაწილზე რაიმე გავლენის მოხდენის რწმენით, ან განზრახვით განხორციელებულ, ან განსახორციელებელ ისეთ საქმიანობას, რომელიც მიმართულია საქართველოს საშინაო, ან საგარეო პოლიტიკის ჩამოყალიბებისკენ, გატარებისკენ, ან შეცვლისკენ, აგრეთვე, ხმარდება, ან შეიძლება მოხმარდეს ისეთ საქმიანობას, რომელიც უცხო ქვეყნის ხელისუფლების ან უცხოური პოლიტიკური პარტიის პოლიტიკური, ან საჯარო ინტერესებიდან, მიდგომებიდან, ან ურთიერთობებიდან გამომდინარეობს. ასეთი გრანტის მიღება პირს მხოლოდ საქართველოს მთავრობის წინასწარი ნებართვით შეეძლება.