სომხეთის პრემიერმინისტრის, ნიკოლ ფაშინიანის პრესსპიკერი ნაზელი ბაღდასარიანი მედიასი გავრცელებულ ინფორმაციას სომხეთში ლგბტ თემის აღლუმის ჩატარების შესახებ სიცრუეს უწოდებს.

ბაღსადარიანის ინფორმაციით, "გავრცელებული მასალა ატარებს უცხოური საინფორმაციო მანიპულაციური ჩარევის (FIMI) დამახასიათებელ ნიშნებს და ჰიბრიდული ზემოქმედების კამპანიების ერთ-ერთ კომპონენტს წარმოადგენს".

"მედიასივრცესა და სოციალურ ქსელებში გავრცელებული განცხადებები, თითქოს სომხეთის რესპუბლიკის პრემიერმინისტრმა ნიკოლ ფაშინიანმა 7 აპრილს ერევანში ლგბტ თემის აღლუმის ჩატარებას მისცა თანხმობა, სიმართლეს არ შეესაბამება.

გავრცელებული მასალა ატარებს უცხოური საინფორმაციო მანიპულაციური ჩარევის (FIMI) დამახასიათებელ ნიშნებს და ჰიბრიდული ზემოქმედების კამპანიების ერთ-ერთ კომპონენტს წარმოადგენს. პუბლიკაციის ავტორი ოკაი დეპრემი წარსულშიც არაერთხელ ავრცელებდა სომხეთის რესპუბლიკის სახელმწიფო ინსტიტუტებთან დაკავშირებით არადამაჯერებელ და მანიპულაციურ ინფორმაციას, რაც დაფიქსირებულია როგორც სომხურ, ისე საერთაშორისო ექსპერტულ წრეებში.

მსგავსი პუბლიკაციების მიზანია საზოგადოების პოლარიზაცია და სახელმწიფო ინსტიტუტების მიმართ ნდობის შესუსტება საარჩევნო პროცესების წინ," — ვკითხულობთ ნიკოლ ფაშინიანის პრესსპიკერის, ნაზელი ბაღდასარიანის განცხადებაში.

ინფორმაცია იმის შესახებ, რომ ნიკოლ ფაშინიანის თანხმობით სომხეთში ლგბტ აღლუმი უნდა ჩატარდეს, პროპაგანდისტულმა მედიებმა "იმედმა" და "POSTV"-მაც გაავრცელა.