ლეგენდარული ლივერპულელი ოთხეულის ამბები სულ მალე დიდ ეკრანზე გაცოცხლდება — The Beatles-ის თითოეულ წევრზე ცალკე ფილმს იღებენ. ოთხივე ფილმის რეჟისორი ოსკარის ნომინანტი სემ მენდესი იქნება, რომელმაც პროექტთან დაკავშირებული გეგმები სულ ახლახან გაგვიმხილა.

ლას-ვეგასში გამართულ CinemaCon-ის ფესტივალზე, მენდესმა განაცხადა, რომ ოთხივე ფილმი ერთდროულად გამოვა 2028 წლის აპრილში. რეჟისორმა სცენაზე მთავარი როლების შემსრულებელი მსახიობებიც წარადგინა. აი, ვინ ითამაშებს ყველა დროის ყველაზე პოპულარული როკჯგუფის წევრებს:

  • პოლ მესკალი პოლ მაკ-კარტნის როლში
  • ჰარის დიკინსონი ჯონ ლენონის როლში
  • ჯოზეფ ქვინი ჯორჯ ჰარისონის როლში
  • ბარი კიოგენი რინგო სტარის როლში

ფოტო: John Russo

მენდესის ამბიციური პროექტის შესახებ პირველი ცნობა გასული წლის დასაწყისში გავრცელდა. მაშინ შევიტყვეთ ისიც, რომ ფილმების შექმნის პროცესში ჯგუფის წევრები და მათი ოჯახებიც იქნებოდნენ ჩართულები. პოლ მაკარტნიმ, რინგო სტარმა და გარდაცვლილი ჯონ ლენონისა და ჯორჯ ჰარისონის ოჯახებმა ფილმის შემქმნელებს არქივზე წვდომისა და მუსიკის გამოყენების უფლებები სრულად გადასცეს. მართალია, The Beatles-ზე აქამდე არაერთი დოკუმენტური ფილმი გადაუღიათ, თუმცა, ეს პირველი შემთხვევაა, როცა პროექტი უშუალოდ ჯგუფის წევრებისა და მათი ოჯახების მხარდაჭერით ხორციელდება.

"ჩვენი მიზანია, ეს პროექტი გამორჩეულად ამაღელვებელ, ეპიკურ კინომოვლენად ვაქციოთ: ოთხი ფილმი, ოთხი განსხვავებული პერსპექტივით მოყოლილი ერთი ამბავი ყველა დროის ყველაზე სახელგანთქმულ ჯგუფზე", — ამბობს ფილმების ერთ-ერთი პროდიუსერი, პიპა ჰარისი, — "დიდი პატივია ისიც, რომ პროექტს The Beatles-ისა და Apple Corps-ის [ჯგუფის დაფუძნებული ორგანიზაცია] მხარდაჭერა აქვს".

ფოტო: Getty Images

The Beatles მუსიკის ისტორიაში ყველაზე პოპულარულ ჯგუფად მიიჩნევა: მსოფლიოში ბენდის გაყიდული ჩანაწერების რაოდენობა 600 მილიონს აღწევს. ინგლისური როკმუსიკის კლასიკად ქცეული ოთხეული ლივერპულში 1960 წელს ჩამოყალიბდა. ათწლიანი არსებობის განმავლობაში კი, The Beatles-მა მუსიკალური ჩარტების ლიდერობით არაერთი რეკორდი მოხსნა. ამასთან, ბენდს მიღებული აქვს გრემის შვიდი ჯილდო და ოსკარიც. ჟურნალ Rolling Stone-ის მიერ 2004 და 2011 წლებში შედგენილ ასეულში — ყველა დროის უდიდესი შემსრულებლები — The Beatles პირველ ადგილზე იყო. გამოცემა Time-მა ჯგუფი მე-20 საუკუნის 100 ყველაზე გავლენიან ადამიანს შორისაც დაასახელა.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...