ოცნების ხელისუფლების პრემიერმინისტრმა, ირაკლი კობახიძემ აშშ-ის ვიცეპრეზიდენტის, ჯეი დე ვენსის სამხრეთ კავკასიაში ვიზიტზე კომენტარი გააკეთა. კობახიძის განმარტებით, ვიზიტი ზანგეზურის თემას ეძღვნება და "სრულიად ბუნებრივია, რომ ამერიკელი პოლიტიკოსი აზერბაიჯანსა და სომხეთში ჩადის".

შემდეგ კობახიძემ დასძინა, რომ ქართულ-ამერიკული ურთიერთობების კონტექსტი "ძალიან მძიმეა" და ოცნება მზად არის სტრატეგიული პარტნიორობის სუფთა ფურცლიდან განახლებისთვის.

"ჩვენი ინფორმაციით, ეს ვიზიტი კონკრეტულად ზანგეზურის თემას ეძღვნება — გამომდინარე აქედან, სრულიად ბუნებრივია, რომ ამერიკელი პოლიტიკოსი აზერბაიჯანსა და სომხეთში ჩადის.

თქვენ იცით, როგორია ქართულ-ამერიკული ურთიერთობების კონტექსტი. ეს კონტექსტში არის ძალიან მძიმე. ეს კონტექსტი ბაიდენის ადმინისტრაციამ შექმნა. ვნახოთ, ამ ფონზე როგორ განვითარდება. ჩვენ მოთმინებით ველოდებით. ჩვენ საჯაროდ გვაქვს გაკეთებული განცხადება იმასთან დაკავშირებით, რომ მზად ვართ სტრატეგიული პარტნიორობის განახლებისთვის სუფთა ფურცლიდან და კონკრეტული გზამკვლევით. ამერიკული ადმინისტრაციის გადაწყვეტილებას მოთმინებით ველოდებით," — განაცხადა ირაკლი კობახიძემ.

ცნობისთვის, აშშ-ის ვიცეპრეზიდენტი ჯეი დი ვენსი თებერვალში აზერბაიჯანსა და სომხეთს ეწვევა. ამის შესახებ აშშ-ის პრეზიდენტმა დონალდ ტრამპმა სოციალურ ქსელში დაწერა. მისი თქმით, ვენსი სომხეთსა და აზერბაიჯანში სამშვიდობო ძალისხმევის გასაძლიერებლად გაემგზავრება.