"არ შევეხებით ბიზნესის თავისუფლებას, მაგრამ ბიზნესთან ერთად გვინდა ვიზრუნოთ ფასების შემცირებაზე", — ამის შესახებ ოცნების პრემიერმა ირაკლი კობახიძემ სამთავრობო ტელეკომპანია "იმედის" ეთერში განაცხადა. მისი თქმით, "ბიზნესი თავისუფალია და უნდა იყოს თავისუფალი".

"ნებისმიერი ბიზნესი ბუნებრივად არის ორიენტირებული მაქსიმალური მოგების მიღებისკენ, მაგრამ აქ შემოდის სოციალური ელემენტი, რაც განსაკუთრებით აქტუალურია, ბუნებრივია, პროდუქციის რეალიზების შემთხვევაში. ჩვენ, როგორც ხელისუფლებას გვაქვს განსაკუთრებული სოციალური პასუხისმგებლობა, რომ ბიზნესის თავისუფლებასთან ერთად, ვიზრუნოთ ამ სოციალური საკითხის მაქსიმალურად მოგვარებაზე. ეს გვესახება ბიზნესთან თანამშრომლობის საფუძველზე. გვაქვს ჩვენი ხელწერა, ჩვენი მუშაობის სტილი, მათ შორის, ბიზნესის თავისუფლება არის ერთ-ერთი უმთავრესი მონაპოვარი, რომლითაც ვამაყობთ 2012 წლის შემდეგ. აქედან გამომდინარე, ბუნებრივია, არ შევეხებით არავითარ შემთხვევაში ბიზნესის თავისუფლებას, მაგრამ, ამასთან ერთად, ბიზნესთან ერთად გვინდა ვიზრუნოთ ფასების შემცირებაზე", — განაცხადა "ოცნების" პრემიერმა ირაკლი კობახიძემ სამთავრობო ტელეკომპანია "იმედის" ეთერში.