სახელმწიფო უსაფრთხოების სამსახური სადისტრიბუციო კომპანიების და ქსელური მარკეტების ოფისებში შევიდა.

უწყებამ IPN-ს განუცხადა, რომ "მოცემულ შემთხვევაში გამოძიების ინტერესის საგანია ფასთა წარმოქმნის პროცესი, რისი შესწავლის მიზნითაც ხდება დოკუმენტების ელექტრონული ვერსიის სასამართლოს განჩინებებით გამოთხოვა".

"მოცემულ შემთხვევაში გამოძიების ინტერესის საგანია ფასთა წარმოქმნის პროცესი, რისი შესწავლის მიზნითაც ხდება დოკუმენტების ელექტრონული ვერსიის სასამართლოს განჩინებებით გამოთხოვა. სხვა ფინანსური საკითხებით ამ შემთხვევაში ჩვენ არ ვინტერესდებით, რადგან ეს არ წარმოადგენს მიმდინარე გამოძიების კვლევის საგანს," — განაცხადა უწყებამ IPN-თან.

უწყების თანამშრომლები "აგროჰაბში" და სადისტრიბუციო კომპანია "დეილი ჯგუფის" სათავო ოფისში შევიდნენ. ცნობისთვის, "დეილი ჯგუფი" აერთიანებს სუპერმარკეტებს — "იოლი", "სპარი", "დეილი", "მაგნიტი", "გვირილა", "კალათა". ხოლო "დეილი ჯგუფის" ჰოლდინგს და სუპერმარკეტ "აგროჰაბს" "რითეილ ასოციაცია" აერთიანებს.

"განვმარტავთ, რომ დღეს, 22 იანვარს, სახელმწიფო უსაფრთხოების სამსახურის ანტიკორუფციულმა სააგენტომ, კანონმდებლობით დადგენილი წესისა და შესაბამისი განჩინების საფუძველზე, მიმართა ასოციაციის წევრ კომპანიებს და გამოითხოვა გარკვეული დოკუმენტაცია, მათ შორის ხელშეკრულებები, პირველადი საბუღალტრო დოკუმენტები, ფაქტურები და ინვოისები.

ასოციაციის ყველა წევრი კომპანია სრულად და შეუფერხებლად თანამშრომლობს საგამოძიებო ორგანოსთან. შესაბამისი პროცედურები მიმდინარეობს მშვიდ გარემოში, სამართლებრივი ნორმებისა და დადგენილი პროცესუალური ჩარჩოების სრული დაცვით.

გამოთხოვილი დოკუმენტაციის მოცულობიდან გამომდინარე, მისი თავმოყრა, დამუშავება და წარდგენა საჭიროებს დამატებით დროს.

შემდგომი ინფორმაციის არსებობის შემთხვევაში, საზოგადოებას მიეწოდება დამატებითი ოფიციალური განმარტება," — განაცხადა "რითეილ ასოციაციის" წარმომადგენელმა BM.ge-თან.

აღნიშნული ფაქტი "აგროჰაბის" დირექტორმა, გიორგი ჯაშიაშვილმა ტვ პირველთანაც დაადასტურა. ჯაშიაშვილის განცხადებით, პრემიერმინისტრთან გუშინდელ შეხვედრაზე აღნიშნულზე ინფორმაცია არ მიუღია.

"სახელმწიფოს უსაფრთხოების სამსახურიდან იყვნენ მოსულები, ანტიკორუფციულიდან. დოკუმენტები და პროგრამული ბაზები მოითხოვეს. თარიღების მიხედვით არის რაღაცები გასაკეთებელი, გავამზადებთ დოკუმენტაციას და მივაწვდით.

არ ვიცოდით (გუშინ, კობახიძესთან შეხვედრისას) დაგვირეკეს წინასწარ, თუ ხართ ოფისში, რაღაც საკითხები გვინდა გავიაროთო და მოვიდნენ.

ფასებთან დაკავშირებით, რაზეც არის ეს პერიოდი საუბარი, მაღალ ფასებთან დაკავშირებით, მაგასთან კავშირშია ზუსტად.

არ ვიცი (რაზე აქვთ ეჭვები) მანდ არის რაღაცები კონკრეტულად ჩასაშლელი - შესყიდვებთან დაკავშირებით ყველა ტიპის დოკუმენტაცია აინტერესებთ. (ჟურნალისტი - რა ფასად იყიდება თითოეული პროდუქტი?) კი კი ეგ ყველაფერი აინტერესებთ," — განაცხადა ჯაშიაშვილმა.

შეგახსენებთ, 21 იანვარს, ირაკლი კობახიძე სასურსათო პროდუქციის ფასებთან დაკავშირებით საკოორდინაციო კომისიაზე ქსელური მარკეტების წარმომადგენლებს შეხვდა.

ირაკლი კობახიძის განცხადებაში ვკითხულობთ, რომ "ბიზნესის თავისუფლება არის მთავარი ამოსავალი წერტილი ჩვენთვის და ბუნებრივია, თავისი პლუსი აქვს, როდესაც ბიზნესი მთლიანად თავისი თავისუფალი შეხედულებით განსაზღვრავს საკუთარ საქმიანობას, თუმცა აქ შემოდის სოციალური ასპექტი, რაც ძალიან მნიშვნელოვანია, ამიტომ, გვინდა ერთად ვიმსჯელოთ, როგორ შეიძლება მოვახერხოთ ფასების დაწევა".

24 დეკემბერს, ქართულმა ოცნებამ სოციალურ ქსელში გაავრცელა ვიდეორგოლი, სადაც ოცნების პრემიერი ირაკლი კობახიძე სასურსათო პროდუქტების ფასების მატებაზე საუბრობს. მისი განცხადებით, "ქართულ და ევროპულ ფასებს შორის სხვაობა საკმაოდ დიდია" და ამის მიზეზი "სადისტრიბუციო კომპანიებისა და მარკეტების მაღალი ფასნამატია, რომელიც საქართველოს საზღვრიდან დახლამდე საშუალოდ 86%-ს შეადგენს". ამავე ვიდეოში მან სუს-ს მოუწოდა, შეისწავლონ სასურსათო პროდუქტების ფასებთან დაკავშირებული საკითხი და დაადგინონ, ხომ არ იკვეთება დანაშაულის ნიშნები. ამას გარდა, ირაკლი კობახიძე პარლამენტს მოსთხოვა," შეექმნა საპარლამენტო კომისია, რომელიც საკითხის შესაფასებლად შესაბამის საპარლამენტო ბერკეტებს გამოიყენებს".