ოცნების პარლამენტის თავმჯდომარემ, შალვა პაპუაშვილმა ჟურნალისტებთან სინდისის პატიმრების შეწყალების საკითხზე ისაუბრა.

მან თქვა, რომ შეწყალება მისი არა, პრეზიდენტის კომპეტენციაა.

"შეწყალება ჩემი კომპეტენცია არ გახლავთ. ეს პრეზიდენტის კომპეტენციაა და მისი გადასაწყვეტია ვინ, როდის და რა მოტივით შეიწყალოს.

რაც შეეხება მათ, ვინც დანაშაული ჩაიდინა — ნებისმიერ დანაშაულს სასჯელი მოსდევს. ამის გაცნობიერებაა მნიშვნელოვანი. დღეს არის მცდელობა იმისა, რომ დანაშაული მოგვყიდონ როგორც კეთილი საქმე, ძალადობა მოგვყიდონ როგორც სიყვარული, პარლამენტის დაწვა მიგვყიდონ როგორც დემოკრატიის ზეიმი. აი ამას აკეთებენ მრუდე ქართველები უცხოური დაფინანსებით!

მთავარი პრობლემა ის არის, რომ უნდათ გარედან თავს მოგვახვიონ ძალადობა, თავს მოგვახვიონ ზიზღი, თავს მოგვახვიონ ქვეყნის წინააღმდეგ ქმედება და ეს ყველაფერი მოგვყიდონ როგორც პროევროპულობა. თურმე "მოლოტოვის კოქტეილის" დამზადება — ბენზინის ჩასხმა, შიგნით ნაჭრის ჩადება, წაკიდება, ადამიანისთვის სროლა და ცეცხლის წაკიდება, ეს არის პროევროპულობა. დღეს ბრიუსელი ამას ამბობს! ამბობს, რომ ადამიანისთვის "მოლოტოვის კოქტეილის" სროლა არის პროევროპულობა.

ბრიუსელი და მათი პოლიტიკური ლიდერები უსამართლოდ გასამართლებულებზე საუბრობენ. ვინ არის უსამართლოდ?! — "მოლოტოვის კოქტეილია" უსამართლობა?!" — თქვა პაპუაშვილმა.

შემდეგ პაპუაშვილმა განაცხადა, რომ ევროკავშირი ახალისებდა პროევროპულ აქციებზე ძალადობას და "მოლოტოვის კოქტეილზე" შუა საუკუნეებში კოცონზე დაწვის ტენდენცია გაიხსენა. მისი თქმით, "მოლოტოვის კოქტეილი" "შუა საუკუნეების კოცონზე დაწვის" სიმბოლოა.

"დანაშაულს უნდა ეწოდოს დანაშაული. როდესაც დანაშაულს უწოდებენ სათნო საქციელს ბრიუსელიდან და ამბობენ, რომ მოლოტოვის კოქტეილის მსროლელი არის უსამართლოდ დაჭერილი, რომ საკუთარი ცოლის გამოყენებით პირადი ცხოვრების ჩამწერი ადამიანი არის უსამართლოდ დაკავებული, რომ თაღლითი არის უსამართლოდ დაკავებული... თქვენ პლაკატებს ხომ ხედავთ ხოლმე, სახელს და გვარებს ხედავთ, რა აწერია ამ პლაკატებს? ე.წ უსამართლო პატიმრები, თუ რასაც ეძახიან — სახელს და გვარებს და სიას ხომ ხედავთ? ყველა იგულისხმება მასში — ადამიანის ცოცხლად დამწველიც, საკუთარი ცოლის ხარჯზე პირადული ვიდეოების გადამღები ადამიანიც იგულისხმება, რომელიც იდეოლოგიური ხელმძღვანელი იყო ერთ-ერთი ამ მოძალადე ჯგუფების, თაღლითებიც იგულისხმება და ყველა — პოლიციელზე თავდამსხმელი, პარლამენტის დამწველები და ეს მოგვეყიდება დღეს, როგორც ევროპულობად. ზუსტად ეს არის დასტური ევროპის ღირებულებითი დაღმასვლის და იმის, რომ ბრუსელს ევროკავშირი მიჰყავს ცივილიზაციურ უფსკრულთან.

...სხვათა შორის შუა საუკუნეებში ადამიანებს წვავდნენ ევროპაში, ეს თუ არის პროევროპულობა, რომ მოლოტოვის კოქტეილის სროლა და ადამიანი ცოცხლად დაწვა — კი ბატონო არის, ოღონდ რამდენიმე ათასწლეულის წინანდელი. ამ იდეოლოგიაშია ჩარჩენილი, თქვენ რა გგონიათ, მოლოტოვის კოქტეილი რისი სიმბოლიზმია? ზუსტად, აი იმ შუა საუკუნეების კოცონზე დაწვისა ადამიანისა, ვისაც არ ეთანხმებოდი იდეოლოგიურად. ამის სიმბოლოა მოლოტოვის კოქტეილი. ამ მხრივ კი, ნამდვილად ევროპულია, ოღოონდ საუკუნის წინანდელი,," — თქვა პაპუაშვილმა.