ქალი პოლიტიკოსები ოკუპირებულ ცხინვალში დაკავებული ქართველი სამოქალაქო აქტივისტის თამარ მეარაყიშვილის მხარდამჭერ განცხადებას ავრცელებენ და საქართველოს მთავრობას მოუწოდებენ, გაავრცელონ საჯარო ინფორმაცია თამარ მეარაყიშვილის ჯანმრთელობის მდგომარეობასთან დაკავშირებით და გამოიყენონ ყველა საერთაშორისო მექანიზმი მისი მონიტორინგისთვის.

"ქალი პოლიტიკოსები მხარდაჭერას და სოლიდარობას ვუცხადებთ ოკუპირებულ ცხინვალში აბსურდული ბრალით უკანონოდ დაკავებულ უფლებადამცველ თამარ მეარაყიშვილს, რომელსაც ორთვიანი წინასწარი პატიმრობა მიესაჯა.

გუშინ ცნობილი გახდა, რომ უკანონო პატიმრობაში მყოფი სამოქალაქო აქტივისტი პროტესტის ნიშნად მშრალ შიმშილობაზე გადავიდა.

თამარი წლებია იცავს ადამიანის უფლებების ოკუპირებულ ცხინვალში და ის არის ქართველი მებრძოლი ქალის სიმბოლო. მისი ჟურნალისტური საქმიანობა, სამოქალაქო აქტივიზმი და ადამიანის უფლებებისთვის გაწეული შრომა არის საყოველთაოდ აღიარებული.
ჩვენ გვაშფოთებს მისი ჯანმრთელობის მდგომარეობა, მას შემდეგ რაც გადაწყვიტა მიემართა პროტესტის უკიდურესი ფორმისთვის, რაც მშრალ შიმშილობაში გამოიხატება. ცნობილია, რომ ის უარს ამბობს არა მხოლოდ საკვებზე, არამედ წყალსა და მედიკამენტებზეც.
ლეგიტიმური ხელისუფლების პირობებში, საქართველოს მთავრობა ყველაფერს უნდა აკეთებდეს თამარ მეარაყიშვილის უკანონო პატიმრობიდან გასათავისუფლებლად, მათ შორის უნდა მიმართავდეს ჟენევის საერთაშორისო დისკუსიების მონაწილე დასავლელ თანათავმჯდომარეებს, ასვე იყენებდეს სხვა საერთაშორისო მექანიზმებს. თუმცა საზოგადოებისთვის ამ დრომდე არაა ცნობილი თუ რას აკეთებს ქმედითს "ქართული ოცნების" საგარეო საქმეთა სამინისტრო, ან სახელმწიფო უსაფრთხოების სამსახური ამისთვის. მათი უმოქმედობა მეტად თვალში საცემია, ვიდრე მუშაობა. მოვუწოდებთ გაავრცელონ საჯარო ინფორმაცია მისი ჯანმრთელობის მდგომარეობასთან დაკავშირებით და გამოიყენონ ყველა საერთაშორისო მექანიზმი მისი მონიტორინგისთვის.

თავისუფლება თამარ მეარაყიშვილს!", — წერია განცხადებაში, რომელსაც ხელს აწერენ: თეონა აქუბარდია, თინა ბოკუჩავა, ანი ქავთარაძე, ხატია დეკანოიძე, მედეა მეტრეველი, თინა ბოლოკაძე, ნინო გოგინაშვილი, ნინო კვიტაიშვილი, ნანა ტოხვაძე, აზა გაბუნია, ნინო დოლიძე, თამარ ყორღანაშვილი, თამარ ლალიაშვილი, ანა კობახიძე, მარიკა არევაძე, ბარბარა ჯიმელი სულაშვილი, თამი ჟორჟოლიანი, თეონა ჭალიძე.

თამარ მეარაყიშვილი 22 დეკემბერს შპიონაჟის ბრალდებით დააკავეს. ოკუპირებული ცხინვალის საქალაქო სასამართლომ 24 დეკემბერს მას ორთვიანი წინასწარი პატიმრობა შეუფარდა.

ქართველი აქტივისტი თამარა მეარაყიშვილი ერთ წელზე მეტია ვერ იღებს ახალ პასპორტს, რაც მას ოკუპირებული სამხრეთ ოსეთის ფარგლებში გადაადგილებასა და დასაქმებაში ხელს უშლის. ის მიიჩნევს, რომ ხელისუფლების ქმედებები სოციალურ მედიაში მის კრიტიკულ პოსტებს უკავშირდება.

მეარაყიშვილმა ბოლო დღეების განმავლობაში რამდენჯერმე დაუკავშირდა ოკუპირებული სამხრეთ ოსეთის პარლამენტის თავმჯდომარეს, ალან მარგიევს, საკუთარი სოციალური ქსელის მეშვეობით და შეხვედრა ითხოვა. მან თქვა, რომ მოთხოვნა ე.წ. პარლამენტის მისაღებშიც შეიტანა, მაგრამ უშედეგოდ.