"არ აქვს ჩემთვის, პირადად, მნიშვნელობა სულხან თამაზაშვილი სანქცირებული იქნება თუ არა. ჩემთვის მთავარი ის პასუხისმგებლობაა", — ამის შესახებ აჭარის მთავრობის თავმჯდომარემ სულხან თამაზაშვილმა აჭარის ტელევიზიის გადაცემაში "თავისუფალი სივრცე" განაცხადა. მისი თქმით, "სანქციები თითქმის არასოდეს არ ემყარება ობიექტურ სამართლებრივ შეფასებას".

"სანქციები უკვე გლობალური პოლიტიკის ჩვეულ ინსტრუმენტად იქცა და თითქმის არასოდეს არ ემყარება ობიექტურ სამართლებრივ შეფასებას. სანქცია არ უნდა იყოს პოლიტიკური ინსტრუმენტი, ადამიანებზე, მით უმეტეს პარტნიორებზე ზეწოლისთვის. არ აქვს ჩემთვის, პირადად, მნიშვნელობა სულხან თამაზაშვილი სანქცირებული იქნება თუ არა. ჩემთვის მთავარი ის პასუხისმგებლობაა, რაც მაქვს ჩემი მოქალაქეების წინაშე და რა თქმა უნდა, ჩემს გუნდთან ერთად გავაგრძელებ ამ პრინციპებით სვლას და ყველაფერს გავაკეთებთ, რომ ქვეყანაში შევინარჩუნოთ მშვიდობა, სტაბილურობა და მეტი კეთილდღეობა მოვუტანოთ ჩვენს მოქალაქეებს", — თქვა სულხან თამაზაშვილმა.

4 ოქტომბრის მოვლენების შეფასებისას მან განაცხადა, რომ "არც ერთი დაკავების საფუძველი არ იყო თავისუფალი აზრის გამოხატვა ან პოლიტიკური მრწამსი, დაკავებებს ყოველთვის უძღვის წინ დანაშაულებრივი ქმედება

"მთელი წლის განმავლობაში ვხედავდით, თუ როგორ ცდილობდნენ პოლიტიკური პროცესები გადაეტანათ ქუჩაში, ხელოვნურად ყოფილიყო საზოგადოებაში შიში, ქაოსი. თუმცა მეორეს მხრივ არ უნდა დაგვავიწყდეს, რომ როცა აქცია, მანიფესტაცია გადადის არეულობისა და ქაოსის ზღვარზე, სახელმწიფოს აქვს ვალდებულება მიიღოს მყისიერი რეაგირება და აღადგინოს საზოგადოებრივი და კონსტიტუციური წესრიგი. რა თქმა უნდა, არც ერთი დაკავების საფუძველი არ იყო თავისუფალი აზრის გამოხატვა ან პოლიტიკური მრწამსი, დაკავებებს ყოველთვის უძღვის წინ დანაშაულებრივი ქმედება და შესაბამისად ამ ფარგლებში მოქმედებს სახელმწიფო", — განაცხადა სულხან თამაზაშვილმა.

სულხან თამაზაშვილი ბრიტანეთის მიერაა სანქცირებული. კერძოდ, თამაზაშვილს დიდი ბრიტანეთისა და ჩრდილოეთ ირლანდიის გაერთიანებულმა სამეფომ 2024 წლის 19 დეკემბერს დაუწესა სანქციები შსს-ის სხვა მაღალჩინოსნებთან, მათ შორის, მინისტრ ვახტანგ გომელაურთან ერთად. მას შემდეგ, სულხან თამაზაშვილი მიხეილ ყაველაშვილმა ღირსების ორდენითაც დააჯილდოვა.