"ტყუილია, მაღალ ფასებთან დღგ-ს არანაირი კავშირი არ აქვს", — ამის შესახებ ოცნების პარლამენტის თავმჯდომარემ, შალვა პაპუაშვილმა ბრიფინგზე განაცხადა. მისი თქმით, "მოქმედი დღგ-ს განაკვეთი წლებია არ შეცვლილა, ამიტომ, არანაირი ახსნა ამას, რა თქმა უნდა, არ ექნებოდა".

"მცდელობები, რომ მოეფიქრებინათ რაღაც სხვა ახსნები - დღგ, რეგულაციები და სხვა ასეთი საკითხები ჩავარდა, თავად რადიკალების მხრიდან უარყოფილ იქნა, რომ რა თქმა უნდა, ტყუილია, მაღალ ფასებთან დღგ-ს არანაირი კავშირი არ აქვს, მოქმედი დღგ-ს განაკვეთი წლებია არ შეცვლილა, ამიტომ, არანაირი ახსნა ამას, რა თქმა უნდა, არ ექნებოდა. შესაბამისად, ყველა ეს ცრუ გამართლება, რომელიც სცადეს, ჩავარდა. ახლა, მნიშვნელოვანია ყველამ ვიმსჯელოთ რასთან გვაქვს საქმე — ეს არის რაიმე ბუნებრივი პროცესი, თუ არის გარკვეული კარტელური გარიგებები მოთამაშეებს შორის. კიდევ ერთხელ შემოვიდა თემა თავისუფალი ბაზრის შესახებ და ის, რომ ბაზარი ყველაფერს არეგულირებს.

რა თქმა უნდა, ბაზარი ყველაფერს ვერ არეგულირებს და სწორედ ეს არის საბაზრო ეკონომიკის გარკვეული დეფექტები, რომელსაც სჭირდება ზოგჯერ რეგულაციებით მოწესრიგება, ზოგჯერ აღსრულების პროცესით რეგულაცია და ა.შ. პარლამენტის მხრიდან თებერვალშივე დაანონსებულია სპეციალური კომისიის შექმნა, როდესაც საგაზაფხულო სესია დაიწყება, ეს იქნება ღია, საჯარო პროცესი, სადაც პარლამენტის აღმასრულებელ ხელისუფლებასთან ერთად, ბაზარზე მოთამაშე სუბიექტებთან ერთად, საზოგადოების თვალწინ შეეცდება გაარკვიოს, როგორ ხდება სასურსათო პროდუქტებზე ფასების წარმოქმნა. ვიცით, ფასები მისი წარმოშობის ადგილზე, რა არის, ვიცით, ტრანსპორტის ხარჯები, ვიცით, საზღვარზე შემოსვლისას, რა ფასით შემოდის და ვიცით, საბოლოო ჯამში, დახლზე, რა ფასად იყიდება. ეს სხვაობა არის არაადეკვატურად დიდი და გავერკვიოთ, სხვაობა საიდან მოდის, რამდენად ობიექტურია ამ სხვაობის არსებობა და თუკი ობიექტური არ არის და არის გარკვეული მცდელობა, რომ იყო ჭარბი მოგება მოსახლეობის ხარჯზე, ესეც გავარკვიოთ, თუ როგორ ხდება, ამის უკან არსებობს თუ არა რაიმე კარტელური შეთანხმებები, რაიმე დარღვევები", — განაცხადა შალვა პაპუაშვილმა.