ფსიქოლოგი ჯანა ჯავახიშვილი "ფსიქიკური ჯანმრთელობის პრობლემის მქონე, ალკოჰოლიზმით, ნარკომანიით ან/და ტოქსიკომანიით დაავადებულ პირთა ერთიანი საინფორმაციო ბაზის" შექმნას სოციალურ ქსელში გამოეხმაურა.

მისი განმარტებით, აღნიშნული ცვლილება "უპრეცედენტო მასშტაბის დისკრიმინაციაა", რადგან ე.წ. "გავრცელებული ფსიქიკური აშლილობები" ცხოვრებაში ერთხელ მაინც ყოველ მეოთხე ადამიანს აქვს. მისივე თქმით, ჯანმრთელობისა და ნარკოლოგიურ სერვისებში ისედაც დაბალი მიმართვიანობა, ცვლილებების შემდეგ, საერთოდ გაქრება.

"მსოფლიო სტატისტიკით, ე.წ. "გავრცელებული ფსიქიკური აშლილობები" ცხოვრებაში ერთხელ მაინც აქვს ყოველ მეოთხე ადამიანს. (ანუ, შფოთვა, დეპრესია, პოსტტრავმული სტრესული აშლილობა, კომპლექსური პოსტტრავმული სტრესული აშლილობა, ადაპტაციური აშლილობა, ობსესიურ-კომპულსიური აშლილობა, ფსიქოაქტიურ საშუალებებზე დამოკიდებულების მსუბუქი და საშუალო ფორმები, და ა.შ.)

კონფლიქტით/ომითა და პოლიტიკური რეპრესიებით დაზარალებულ, ეკონომიკურ კრიზისში მყოფ საზოგადოებებში ეს სტატისტიკა კიდე უფრო მაღალია (30% და მეტი). საქართველო სწორედ ასეთი ქვეყანაა.

რა გამოდის — რომ ჩვენი მოსახლეობის ერთი მესამედი ექიმებმა და ფსიქოლოგებმა სახელმწიფოს სპეციალურ სიაში უნდა შეატანინონ. ეს უპრეცედენტო მასშტაბის დისკრიმინაციაა.

მიმართვიანობა ფსიქიკური ჯანმრთელობისა და ნარკოლოგიურ სერვისებში დღეს ისედაც დაბალია და ახლა უკვე საერთოდ გაქრება; უამრავი ადამიანი პროფესიული დახმარების გარეშე დარჩება. გაიზრდება სუიციდის სტატისტიკა", — დაწერა ფსიქოლოგმა.

ჯანა ჯავახიშვილი ასევე წერს, რომ ცხოვრების დაბალი ხარისხი და მაღალი სოციალური დაუცველობა ფსიქიკური აშლილობების გავრცელებას უწყობს ხელს, რასაც ცივილიზებული დასავლური სახელმწიფოები სოციალური დაცვის გაზრდით ებრძვიან. მისი თქმით, ამ პაქტიკის საპირისპიროდ, რუსეთი ფსიქიკური აშლილობების მქონე პირთა რეესტრს ადგენს.

"რატომ გვკლავთ? ასეთი მშვიდობა გინდათ? შფოთვისა და დეპრესიის რომ გვეშინოდეს (რაც დეფინიციის თანახმად, გავრცელებული პრობლემებია!), რომ ამ ე.წ. რეესტრში არ შეგვიტანონ და არ დაგვჩაგრონ?...

რაც უფრო დაბალია ცხოვრების ხარისხი და მაღალია სოციალური დაუცველობა, მით უფრო მაღალია ფსიქიკური აშლილობების გავრცელება.

რას აკეთებენ საპასუხოდ ცივილიზებული დასავლური სახელმწიფოები? ცდილობენ, რომ გაზარდონ სოციალური დაცვა, შექმნან დასაქმების შესაძლებლობები, დააფინანსონ ფსიქიკური აშლილობების მქონე ადამიანებზე ზრუნვის სათემო სერვისები, ხელი შეუწყონ მათ ინტეგრაციას.

ამის საპირისპიროდ, რას აკეთებს რუსეთი? ფსიქიკური აშლილობების მქონე პირთა რეესტრს ადგენს, რომ მოსახლეობის დაშინებისა და ჩაგვრის კიდევ ერთი ბერკეტი შექმნას.

რას ვაკეთებთ დღეს ჩვენ? მივყვებით რუსულ სცენარს — ვქმნით ფსიქიკური აშლილობების მქონე ადამიანების, როგორც შუა საუკუნეებში კეთროვნების, სიას.

როდემდე უნდა ვანგრიოთ დამოუკიდებლობის პერიოდში ყოველდღიური შრომით მიღწეული შედეგები? სადამდე უნდა დავეცეთ?", — დაწერა ჯანა ჯავახიშვილმა.

ცნობისთვის, ოცნების პარლამენტის გადაწყვეტილებით 2026 წლის 1-ელ მარტამდე უნდა შეიქმნას "ფსიქიკური ჯანმრთელობის პრობლემის მქონე, ალკოჰოლიზმით, ნარკომანიით ან/და ტოქსიკომანიით დაავადებულ პირთა ერთიან საინფორმაციო ბაზა" — "ფსიქიკური ჯანმრთელობის შესახებ" კანონპროექტში ამ ცვლილებაზე და ამ ბაზის შექმნაზე პასუხისმგებელი ოცნების ხელისუფლების ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროა, ცვლილებების ინიციატორი კი შინაგან საქმეთა სამინისტროა.

კანონპროექტში ცვლილებების მიხედვით, დევნილთა სამინისტროს ევალება:

• პირის ფსიქიკური ჯანმრთელობის შესახებ ჯანმრთელობის პრობლემის მქონე, ალკოჰოლიზმით, ნარკომანიით ან/და ტოქსიკომანიით დაავადებულ პირთა ერთიან საინფორმაციო ბაზაში მონაცემები შეტანა;
• ფსიქიკური ჯანმრთელობის პრობლემის მქონე პირების შესახებ მონაცემების შესაბამისი სახელმწიფო და კერძო დაწესებულებებისგან მოპოვება;
• აღნიშნულ ბაზაში მონაცემების შეტანის კრიტერიუმების
  შემუშავება;

ფსიქიკური ჯანმრთელობის პრობლემის მქონე და ალკოჰოლიზმით დაავადებულ პირთა ერთიან საინფორმაციო ბაზა იქმნება — რა წერია კანონში?