საქართველოს ეროვნულ მუზეუმში, თიბისი ბანკისა და ჯეოსელის ორგანიზებით, ბიზნესდაჯილდოების შუალედური საღამო გაიმართა. ღონისძიებაზე მიწვეულები იყვნენ ბიზნესდაჯილდოებაზე დარეგისტრირებული კომპანიები, რომლებიც 2017 წლის დეკემბერში მთავარი ჯილდოს მოსაპოვებლად იბრძოლებენ.

შუალედურ საღამოზე თიბისისა და ჯეოსელის წარმომადგენლებმა ბიზნესდაჯილდოების რეგისტრაციის პროცედურა შეაჯამეს და თავისი ახალი პროდუქტები წარადგინეს. ეროვნული მუზემის ეზოში დამონტაჟებულ სცენაზე სიტყვით გამოსვილსას, თიბისი ბანკის გენერალური დირექტორის მოადგილემ, ნიკა ქურდიანმა 2017 წლის ბიზნესდაჯილდოების სარეგისტრაციო პროცესს წარმატებული უწოდა და აღნიშნა, რომ შედეგებმა მოლოდინს გადააჭარბა.

ნიკა ქურდიანმა აღნიშნა, რომ მიმდინარე წლის ბიზნესდაჯილდოებაზე სულ 661 მონაწილე დარეგისტრირდა. მისი თქმით, თითოეული მათგანი ახალ და განსხვავებულ პროდუქტს ქმნის, რაც საქართველოს ბიზნესის განვითარებაზე დადებითად მეტყველებს. მისი თქმით, ბიზნესდაჯილდოება აუცილებლად გაგრძელდება და ის უფრო მეტ სიახლეს შესთავაზებს ქართველს ბიზნესმენებს.

სიტყვით გამოვიდა ჯეოსელის აღმასრულებელი დირექტორი პაველ სმალინსკიც, რომელმაც თიბისი ბანკს პარტნიორობისთვის მადლობა გადაუხადა. პაველმა აღნიშნა, რომ ახალი იდეების დანერგვა და მათი წახალისება უმნიშვნელოვანესია ბიზნეს სექტორის გასააქტიურებლად და ბიზნესდაჯილდოება ამის საუკეთესო მაგალითად მიაჩნია.

თიბისი ბანკის სამეთვალყურეო საბჭოს თავჯდომარემ, მამუკა ხაზარაძემ, ბიზნესდაჯილდოებაში მონაწილეებს სამოტივაციო სიტყვით მიმართა. მამუკა ხაზარაძემ ბიზნესმენებს ურჩია, რომ საკუთარ იდეებსა და ინიციატივებს ბოლომდე მიყვნენ, რათა დასახულ მიზანს მიაღწიონ:

„იმისთვის, რომ წარმატებას მიაღწიო, საჭიროა საქმის ფანატიკური სიყვარული... როდესაც ფიქრობ, რომ უამრავი დრო და ენერგია დახარჯე, ყველაფერი გააკეთე, მაგრამ უშედეგოდ და გადაწყვეტ, რომ დაიღალე, სწორედ ის ერთი ნაბიჯი შეიძლება გაშორებდეს უდიდეს წარმატებას. ამიტომ არ დანებდეთ და მიყევით იდეებს ბოლომდე,“- თქვა მამუკა ხაზარაძემ.

სიტყვით გამომსვლელების შემდეგ, სტუმრების განწყობაზე ორკესტრმა ბიგ ბენდმა იზრუნა. შუალედურ საღამოზე მოწვეულ სტუმრებს ორგანიზატორებისგან სიმბოლური საჩუქრები გადაეცათ. ეროვნული მუზეუმის ეზოში დამონტაჟებული იყო სპეციალური კუბი, რომელზეც ბიზნესდაჯილდოებაში მონაწილეები საკუთარი კომპანიების სახელებს წერდნენ და სპეციალური ტაბლეტის საშუალებით ამონტაჟებდნენ.

ღონისძიებით კმაყოფილები იყვნენ თავად კონკურსანტებიც, რომლებსაც ერთმანეთის გაცნობისა და ბიზნესზე საუბრის საშუალება მიეცათ. ერთ-ერთი მონაწილე კომპანიის, Ice 'N Rolls-ის დამფუძნებელი, გიორგი რაზმაძე, ჩვენთან საუბარში შუალედურ საღამოს დადებითად აფასებს და ამბობს, რომ ამგვარი შეხვედრები სტარტაპერებს დაახლოებაში ეხმარებათ.

„ბიზნესდაჯილდოება 2017 ზუსტად ისეთია, როგორიც წარმომედგინა. შუალედური ღონისძიება, ძალიან საინტერესო გამოვიდა, რისთვისაც მადლობას ვუხდით თიბისი ბანკსა და ჯეოსელს. ყველაფერი ძალიან კარგად იყო ორგანიზებული. საინტერესო იყო სხვა სტარტაპერების გაცნობა, ჩვენი გამოცდილებებისა და გეგმების გაზიარება. სწორედ ასეთი შეხვედრები გვეხმარება სხვადასხვა სტარტაპებთან სამომავლო თანამშრომლობაში. ვფიქრობ, რომ გუშინდელი საღამო მართლაც წარმატებულად შედგა“ - ამბობს გიორგი რაზმაძე.

რაც შეეხება ფინალისტებს, მათი ვინაობა უახლოს მომავალში გახდება ცნობილი. 2017 წლის ბიზნესდაჯილდოების გამარჯვებულები კი მიმდინარე წლის დეკემბერში გამოვლინდებიან.

#გააზიარეწარმატება - ამ სლოგანით საქართველოს ისტორიაში ყველაზე მასშტაბური ბიზნესდაჯილდოება, თიბისი ბანკისა და ჯეოსელის ორგანიზებით, წელს მეორედ გაიმართება. შვიდ ნომინაციაში კონკურსანტების რეგისტრაცია უკვე დასრულებულია და ის ვებგვერდზე businessaward.ge-ზე მიმდინარეობდა.