ექიმმა დავით ჩახუნაშვილმა მაგისტრი მოსამართლის წინაშე დაკითხვის შემდეგ ჟურნალისტებთან საუბრისას განაცხადა, რომ მას BBC გამოძიებაში გამოყენებული კვლევის მეთოდოლოგიაზე და დასკვნაზე კითხვები დაუსვეს. უწყების მთავარი ინტერესი იყო ფიგურირებდა, თუ არა ჩახუნაშვილების ჩატარებულ კვლევაში ქიმიური ნივთიერება "კამიტე", რომლის პროევროპულ აქციებზე გამოყენებასაც BBC ამტკიცებს.

ექიმის აზრით სუს-ის მხრიდან გამოძიების დაწყების მიზანია, რომ "მომავალში ადამიანებს კვლევის ჩატარება აღარ მოუნდეთ, ან უსამართლობის წინააღმდეგ ხმა არ ამოიღონ".

"აინტერესებდათ თუ სად ვსწავლობდი, თუ როგორია ჩემი სამეცნიერო ხარისხი და სად მაქვს კვლევები გამოქვეყნებული. მეორე საკითხი შეეხებოდა [ექიმების ჯგუფის მიერ მომზადებულ] კვლევას, დაინტერესდნენ კვლევის მეთოდოლოგიაზე, შინაარსსა და დასკვნაზე. დეტალებში ავუხსენი მოსამართლეს, თუ რა იყო კვლევის მიზანი, როგორი იყო მეთოდოლოგია და დასკვნა, უბრალოდ გამოძიების მხარეს ისევ ჰქონდა კითხვები, თუ რა იყო დასკვნა, როდესაც ამაზე პასუხი გაცემული მქონდა. როგორც ჩანს ვერ მიხვდნენ, არ იყვნენ კვლევის მეთოდოლოგიებში კარგად გაცნობიერებულები და გარკვეულნი. შთაბეჭდილება დამრჩა, რომ კვლევა წაკითხული არ ჰქონდათ.

ასევე, დაინტერესდნენ ფიგურირებდა თუ არა "კამიტე" ჩვენს სტატიაში. ჩვენ კვლევაში ამაზე საუბარი არ ყოფილა.

დაკავების მოლოდინი, არ ვიცი, უნდა მქონდეს თუ არა. ისეთ ქვეყანაში ვცხოვრობთ, რომ ნებისმიერ ადამიანს, ნებისმიერი რამის მოლოდინი უნდა ჰქონდეს. ამ ყველაფრის მიზეზი შეიძლება იყოს ის, რომ მომავალში ადამიანებს კვლევის ჩატარება აღარ მოუნდეთ, ან უსამართლობის წინააღმდეგ ხმა არ ამოიღონ," — განაცხადა ექიმმა დავით ჩახუნაშვილმა მაგისტრი მოსამართლის წინაშე დაკითხვის შემდეგ. (ტექსტი IPN)

შეგახსენებთ, სუს-მა BBC-ის ჟურნალისტურ გამოძიებასთან დაკავშირებით გამოძიება დაიწყო. უწყების ინფორმაციით გამოძიება სამსახურებრივი უფლებამოსილების გადამეტებას და უცხოეთის ორგანიზაციისთვის მტრულ საქმიანობაში დახმარების მუხლებით დაიწყო.

სუს-მა გამოკითხვაზე ექიმები კონსტანტინე და დავით ჩახუნაშვილები დაიბარა. კონსტანტინე ჩახუნაშვილი BBC-ს გამოძიების ერთ-ერთი რესპოდენტია და მედია გამოძიებაში მის კვლევას იყენებს. მოგვიანებით უწყებაში ჩახუნაშვილების თანამკვლევარი გელა ღუნაშვილი და ექიმი გიორგი ჩახუნაშვილიც დაიბარეს.