შინაგან საქმეთა სამინისტროს განცხადებით, პოლიცია თბილისის საკრებულოს შენობის მიმდებარე ტერიტორიაზე კანონიერად არის განლაგებული. უწყების თქმით, საკრებულოს თავმჯდომარის მოთხოვნა და ღია წყაროებით მიღებული იფნორმაცია წარმოადგენდა საკმარის საფუძველს ვარაუდისთვის, რომ პოლიტიკური პარტიის აქტივისტების საკრებულოს შენობაში შეშვებას, შესაძლოა, გამოეწვია ფიზიკური და სიტყვიერი დაპირისპირება.

"პოლიციის შესახებ საქართველოს კანონის 25-ე მუხლის პირველი პუნქტის შესაბამისად, პოლიციელი უფლებამოსილია პირს მოსთხოვოს გარკვეული ადგილის განსაზღვრული დროით დატოვება ან აუკრძალოს მას კონკრეტულ ტერიტორიაზე შესვლა, თუ ეს აუცილებელია საფრთხის თავიდან ასაცილებლად", - აცხადებს შსს.

უწყებისვე ცნობით, პარლამენტის რეგლამენტით პარლამენტით დეპუტატს უფლება აქვს შეუფერხებლად შევიდეს სახელმწიფო ორგანოებში, გარდა გამონაკლისი შემთხვევებისა:

"შესაბამისად, კანონი, რომელიც ამ უფლებას ანიჭებს პარლამენტის წევრს, თავადვე ადგენს შეზღუდვასაც სხვა საკანონმდებლო აქტებით დადგენილი გარემოებების სასარგებლოდ".

საქართველოს ახალგაზრდა იურისტთა ასოციაციის იურისტის ირმა პავლიაშვილის თქმით, თბილისის საკრებულოს პარლამენტის დეპუტატების სხდომაზე არ შეშვების უფლება არ ჰქონდა. პავლიაშვილმა On.ge-ს უთხრა, რომ თუ სხდომა იხურება, ის უნდა დაიხუროს ყველასთვის.

საკრებულოს თავმდჯომარემ, გიორგი ალიბეგაშვილმა განაცხადა, რომ საკრებულოს დღევანდელ სხდომაზე დასწრების უფლება მხოლოდ საკრებულოს წევრებსა და მედიას ჰქონდათ. ალიბეგაშვილის თქმით, ამის მიზეზია ოპოზიციის გაცხადებული მიზანი საკრებულოს სხდომის ჩაშლის შესახებ. პოლიციის თანამშრომლებმა, რომლებსაც თბილისის საკრებულოს შენობა ალყაში აქვთ, საქართველოს პარლამენტის დეპუტატები შენობაში არ შეუშვეს, რასაც დაპირისპირება მოჰყვა.

დღეს, 10 ოქტომბერს, თბილისის საკრებულომ ივანიშვილთან დაკავშირებული კომპანიებისთვის თბილისის ცენტრში მიწების ერთ ლარად გადაცემის საკითხს მხარი დაუჭირა.