ლელო — ძლიერი საქართველოს ერთ-ერთ ლიდერს, ალეკო ელისაშვილს, თბილისის საქალაქო სასამართლოს კანცელარიის დაწვის მცდელობისთვის, ბრალს დღეს წარუდგენენ. ამის შესახებ ინფორმაციას IPN ავრცელებს.

ელისაშვილის ადვოკატის, გიორგი რეხვიაშვილის თქმით, მისი დაცვის ქვეშ მყოფს ბრალდების წარდგენის შემდეგ მოინახულებს და დამატებით ინფორმაციას მოგვიანებით გაავრცელებს.

"დღეს ველოდებით ჩვენ ბრალის დადგენილების ჩაბარებას. ალბათ, ხვალ იქნება. სასამართლო დადგენილების ჩაბარების შემდგომ მექნება მეტი ინფორმაცია და შემდეგ მოვინახულებ", — თქვა ადვოკატმა.

ცნობისთვის, ალეკო ელისაშვილი გუშინ დააკავეს. შინაგან საქმეთა სამინისტროს ინფორმაციით, მან 29 ნოემბერს, დილით, თბილისის საქალაქო სასამართლოს კანცელარიის შენობის დაწვა სცადა.

"გამოძიებით დგინდება, რომ მიმდინარე წლის 29 ნოემბერს, გამთენიისას, ალექსანდრე ელისაშვილმა, შენიღბულმა, ჩაქუჩის გამოყენებით ჩაამსხვრია თბილისის საქალაქო სასამართლოს კანცელარიის შენობის გარე ფასადის მინა, შეაღწია სასამართლოს კანცელარიის შიდა სივრცეში, სადაც პერიმეტრზე ბენზინი დაასხა, მათ შორის, საკანცელარიო ნივთებზე, ტექნიკაზე, დოკუმენტაციაზე და შენობის დაწვა სცადა. მას შემთხვევის ადგილზევე წაასწრეს სასამართლოს მანდატურის სამსახურის წარმომადგენლებმა, რომლებსაც ელისაშვილმა თანნაქონი ცეცხლსასროლი იარაღის გამოყენებით წინააღმდეგობა გაუწია და ფიზიკური შეურაცხყოფა მიაყენა. გაწეული წინააღმდეგობის მიუხედავად, ალექსანდრე ელისაშვილი მანდატურებმა ადგილზევე დააკავეს", — წერია შსს-ს მიერ გავრცელებულ განცხადებაში.