საქართველოს ბანკი, როგორც განათლების მთავარი მხარდამჭერი, სკოლის მოსწავლეების, მასწავლებლების, სტუდენტებისა და მშობლების ფინანსური განათლების ხელშეწყობის მიზნით, მხარს უჭერს და ახორციელებს არაერთ პროექტს. ამჯერად, ბანკის ორგანიზებით, პირადი ბიუჯეტის დაგეგმვაზე, ფინანსურ მიზნებზე, ყოველდღიურ ცხოვრებაში ინვესტიციებსა და გონივრულ გადაწყვეტილებებზე გაიმართა ტრენინგი, რომელშიც მონაწილეობა 50- მდე სტუდენტმა მიიღო.

ტრენინგს უძღვებოდნენ საქართველოს ეკონომიკური წიგნიერების ინიციატივის თანადამფუძნებელი და ეკონომისტი — ბაქარ ბარათაშვილი და სკოლის პედაგოგი და ტრენერი — ანა ქათამაძე.

სტუდენტებს, მიუხედავად ფაკულტეტისა თუ კურსისა, შესაძლებლობა ჰქონდათ, მიეღოთ საბაზისო და პრაქტიკული ინფორმაცია ფინანსურ რჩევებთან დაკავშირებით.

“სესიაზე დეტალურად განვიხილეთ თემები, რომლებიც პირადი ფინანსების მართვის საწყის ნაბიჯებს ქმნის. მაგალითად: როგორ ფუნქციონირებს ბაზარი და რა როლი აქვს მოთხოვნა-მიწოდების ბალანსს; როგორ ხდება ბიუჯეტის შედგენა და რესურსების სწორი გადანაწილება; რა განსხვავებაა სურვილებსა და საჭიროებებს შორის და რატომ არის ეს ცოდნა პასუხისმგებლიანი ფინანსური ქცევის საფუძველი. განსაკუთრებული ყურადღება დავუთმეთ იმ ფსიქოლოგიურ ფაქტორებს, რომლებიც ხშირად გაუცნობიერებლად გვაღებინებს ფინანსურ გადაწყვეტილებებს — იმპულსურ ხარჯვას, რისკებისადმი დამოკიდებულებას. გარდა ამისა, შევეხეთ ინვესტირების საწყის პრინციპებსაც: რატომ იწყება ყველაფერი გრძელვადიანი მიზნების განსაზღვრით და რა არის რისკისა და სარგებლის ბალანსი“, — აღნიშნა ბაქარ ბარათაშვილმა, საქართველოს ეკონომიკური წიგნიერების ინიციატივის თანადამფუძნებელმა.

“მოხარულები ვართ, რომ ტრენინგზე სტუდენტების აქტიური ჩართულობა და ინტერესი გამოიხატა არაერთი შეკითხვით, დისკუსიითა და პრაქტიკულ მაგალითებზე მუშაობით. ეს კიდევ ერთხელ ადასტურებს, რომ ახალგაზრდებში ფინანსური განათლების შესახებ მეტი ინფორმაციის მიღების საჭიროებაა და მოტივაციაც საკმაოდ მზარდია“, — აღნიშნა ანა ქათამაძემ, სკოლის პედაგოგმა და ტრენერმა.

“ჩვენთვის, როგორც ფინანსური ინსტიტუტისთვის, განათლებისა და განსაკუთრებით, ფინანსური განათლების მხარდაჭერა, ერთ-ერთი უცვლელი პრიორიტეტია. გვინდა, სტუდენტებს მაქსიმალურად შევუწყოთ ხელი ფინანსური განათლების მიღებაში და მათთვის ისეთი ტრენინგები ჩავატაროთ, რომლებიც სტუდენტების საჭიროებებზე, ინტერესებსა და სპეციფიკაზე იქნება მორგებული. ვფიქრობთ, ფინანსური ცოდნა აუცილებელია ყველასთვის, განურჩევლად იმისა, თუ რომელია სტუდენტის ძირითადი ფაკულტეტი და მიმართულება“, — აცხადებს ანა ლომთაძე, საქართველოს ბანკის კორპორაციული სოციალური პასუხიმგებლობის (CSR) მიმართულების ხელმძღვანელი.

ინფორმაციისთვის, ამ ტიპის შეხვედრები როგორც სტუდენტებისთვის, ისე სხვა აუდიტორიისთვის კვლავ ჩატარდება. თვალი ადევნეთ ჩვენს ფეისბუქ გვერდს ან გადადით ლინკზე: საქართველოს ბანკი — გზა სულ არის, არ გაჩერდე.