ამერიკის შეერთებული შტატების სახელმწიფო დეპარტამენტის წარმომადგენელი, ჯონათან ასკონასი საქართველოს ეწვია. ამის შესახებ ინფორმაციას ამერიკის საელჩო ავრცელებს.

საელჩოს განმარტებით, მისი ვიზიტის მიზანი "საერთაშორისო მშვიდობისა და კეთილდღეობისათვის ტრამპის მარშრუტის"(TRIPP) მხარდაჭერაა. მათვე ცნობით, დოქტორი ასკონასი "სადახლო საავტომობილო" საბაჟო-გამშვებ პუნქტს ესტუმრა და ვიზიტის ფარგლებში საგარეო საქმეთა სამინისტროსა და მთავრობის ადმინისტრაციის, ასევე საერთაშორისო საფინანსო ინსტიტუტების წარმომადგენლებს, შეხვდება.

"მოხარულები ვართ ვუმასპინძლოთ აშშ-ის სახელმწიფო დეპარტამენტის წარმომადგენელს (უფროს მრჩეველს) ჯონათან ასკონასს საქართველოში!

მისი ვიზიტის მიზანია განიხილოს, როგორ შეძლებს საქართველო მხარი დაუჭიროს "ტრამპის მარშრუტს საერთაშორისო მშვიდობისა და კეთილდღეობისათვის" (TRIPP). ეს სატრანსპორტო მარშრუტი სომხეთსა და აზერბაიჯანს შორის შეერთებული შტატების შუამავლობით 8 აგვისტოს გამართული სამშვიდობო სამიტის შედეგია.

დღეს დილით დოქტორი ასკონასი ესტუმრა საბაჟო გამშვებ პუნქტს — "სადახლო საავტომობილო", რომლის მშენებლობა და აღჭურვა დიდწილად აშშ-ის მხარდაჭერით გახდა შესაძლებელი. ვიზიტის ფარგლებში ის ასევე შეხვდება საქართველოს საგარეო საქმეთა სამინისტროსა და მთავრობის ადმინისტრაციის, ასევე საერთაშორისო საფინანსო ინსტიტუტების წარმომადგენლებს", — წერია საელჩოს განცხადებაში.