საქართველოს მე-5 პრეზიდენტი, სალომე ზურაბიშვილი "ოცნების" ხელისუფლების მიერ "საარჩევნო კოდექსში" ცვლილებებს ეხმაურება, რომლის მიხედვითაც საზღვარგარეთ მყოფი ქართველები უცხოეთში არჩევნებში მონაწილეობას ვეღარ შეძლებენ.

"ემიგრანტებისთვის ხმის მიცემის უფლების წართმევის გადაწყვეტილება კანონად აქცევს იმ მკაცრ შეზღუდვებს, რომლებმაც გასული წლის ოქტომბერში ასობით ათას ადამიანს ხმის მიცემაში ხელი შეუშალა. კიდევ ერთი ნაბიჯი საზოგადოების ტოტალური კონტროლისკენ, როგორც საზღვრებს შიგნით და მის გარეთ!", — წერს ზურაბიშვილი.

კიდევ ერთ ტვიტში სალომე ზურაბიშვილი წერს, რომ "რუსულმა რეჟიმმა" კიდევ ერთი ნაბიჯი გადადგა იზოლაციისკენ: ამჯერად თავისი მოსახლეობიდან ქართული დიასპორა გამოყო, რომელიც ქვეყნის მოსახლეობის ერთ მეოთხედს წარმოადგენს".

ოცნების პარლამენტის თავმჯდომარემ გუშინ გამართულ ბრიფინგზე თქვა, რომ საზღვარგარეთ მყოფი მოქალაქეები არჩევნებში მონაწილეობას ვერ მიიღებენ, ოთხ წელიწადში ერთხელ, სამშობლოში თუ არ ჩამოვლენ ხმის მისაცემად.

შალვა პაპუაშვილმა ბრიფინგზე განაცხადა, რომ აღნიშნული საკანონმდებლო ინიციატივის მიღებას ოცნების პარლამენტი წლის ბოლომდე გეგმავს.