მექსიკის დედაქალაქში ანტისამთავრობო საპროტესტო აქციების დროს შეტაკებებში, მინიმუმ 120 ადამიანი — მათ შორის 100 პოლიციელი — დაშავდა. ინფორმაციას BBC ადგილობრივ პოლიციაზე დაყრდნობით ავრცელებს.

ათასობით დემონსტრანტმა მეხიკოში შაბათს, 15 ნოემბერს, მარში გამართა, რათა ძალადობრივი დანაშაულისა და პრეზიდენტ კლაუდია შეინბაუმის მთავრობის წინააღმდეგ უკმაყოფილება გამოეხატათ.

შეინბაუმმა განაცხადა, რომ ეს აქციები დაფინანსებული იყო იმ მემარჯვენე პოლიტიკოსების მიერ, რომლებიც ოპოზიციაში არიან.

აქცია Gen Z-ის ახალგაზრდული ჯგუფების მიერ იყო ორგანიზებული. დემონსტრანტები გახმაურებულ მკვლელობებს, მათ შორის ურუაპანის მერის, კარლოს მანსოს ცოტა ხნის წინ მომხდარ მკვლელობას აპროტესტებდნენ.

დემონსტრანტებმა ეროვნული სასახლის დამცავი ბარიერის ნაწილები დაშალეს, სადაც პრეზიდენტი შეინბაუმი ცხოვრობს. შენობასთან მყოფმა პოლიციამ დემონსტრანტების წინააღმდეგ ცრემლსადენი გაზი გამოიყენა.

მეხიკოს უსაფრთხოების უფროსმა პაბლო ვასკესმა ჟურნალისტებს განუცხადა, რომ ძარცვისა და თავდასხმის ბრალდებით, 20 ადამიანია დაკავებული.

მანსო 1-ელ ნოემბერს ცეცხლსასროლი იარაღით "გარდაცვლილთა დღის" ფესტივალის დროს მოკლეს.

ის ცნობილი იყო როგორც კარტელებთან დაკავშირებული დანაშაულის შესახებ ღიად მოლაპარაკე ფიგურა. იგი აქტიურად ითხოვდა მკაცრი ზომების მიღებას შეიარაღებული ჯგუფების წინააღმდეგ, რომლებიც ქვეყანას ტერორში ამყოფებენ.

აქციამდე რამდენიმე დღით ადრე პრეზიდენტმა თქვა, რომ დემონსტრაცია ინტერნეტში "ბოტების" მიერ იყო ხელშეწყობილი.

"ჩვენ მხარს ვუჭერთ სიტყვისა და გამოხატვის თავისუფლებას, თუ ახალგაზრდებს აქვთ მოთხოვნები, მაგრამ აქ მთავარი საკითხია — ვინ აწყობს ამ დემონსტრაციას," — აღნიშნა მან ბრიფინგზე.